کراچی میں بھتہ مافیا کے خلاف سندھ تاجر اتحاد کی غیر معینہ مدت تک ہڑتال کی دھمکی

آل کراچی تاجراتحاد نے حکومت سندھ کی گمشدگی کا اشتہار شائع کرانے کا اعلان کررکھا ہے۔ فوٹو: آئی این پی

---

کراچی میں بدامنی اور بھتہ مافیا کی بڑھتی کارروائیوں کے پیش نظر سندھ تاجر اتحاد نے شہر میں غیر معینہ مدت اور پاکستان بھر میں ایک روزہ ہڑتال کی دھمکی دے دی ہے۔

کراچی پریس کلب کے سامنے احتجاج کے دوران تاجر تنظیم کے رہنماؤں کا کہنا تھا کہ بھتہ خوروں نے کراچی کے شہریوں اور تاجروں کی زندگی اجیرن کر رکھی ہے اور صوبائی حکومت کی جانب سے بھتہ مافیا کے خلاف کوئی بھی کاروائی نہیں کی جاتی اس لئے وہ سمجھتے ہیں کہ کراچی کو فوج کے حوالے کیا جائے تاکہ شہر سے جرائم اور بھتہ مافیا کا خاتمہ کیا جاسکے۔ ان کا کہنا تھا کہ اگر شہر میں امن کے لئے کوششیں نہ کی گئی تو تاجر برادری سندھ اسمبلی کے اجلاس کے موقع پر اسمبلی کے گھیراؤ کے علاوہ شہر میں غیر معینہ مدت اور ملک بھر میں کم از کم ایک دن کی ہڑتال کرے گی۔

واضح رہے کہ شہر میں بڑھتی ہوئی بھتہ خوری کے خلاف آل کراچی تاجراتحاد نے گزشتہ روز حکومت سندھ کو 72 گھنٹے کا الٹی میٹم دیتے ہوئے صوبائی حکومت کی گمشدگی کا اشتہار شائع کرانے کا اعلان کیا تھا۔