کوئٹہ کی رحمانیہ مسجد میں بم دھماکے سے 3 نمازی شہید 25 زخمی
وزیر اعظم نے دھماکے کی شدید مذمت کرتے ہوئے واقعے کی رپورٹ طلب کرلی
زخمیوں کو طبی امداد کے لیے اسپتال منتقل کیا گیا (فوٹو: ٹوئٹر)
پشتون آباد میں مسجد کے اندر دھماکے کے نتیجے میں 3 نمازی شہید اور 25 زخمی ہوگئے۔
ایکسپریس نیوز کے مطابق کوئٹہ کے علاقے پشتون آباد میں مسجد رحمانیہ کے اندر دھماکا ہوا جس کے نتیجے میں مسجد کے پیش امام سمیت 3 نمازی شہید اور 25 زخمی ہوگئے۔ جائے وقوع کو سیکیورٹی فورسز اور پولیس نے گھیرے میں لیا اور شواہد جمع کیے۔
پولیس ذرائع کے مطابق مسجد میں بم نصب کیا گیا تھا جس کے ذریعے دھماکا کیا گیا۔
وزیر اعظم عمران خان نے پشتون آباد میں دھماکے کی شدید مذمت کرتے ہوئے واقعے کی رپورٹ طلب کرلی۔ وزیر اعظم نے زخمیوں کو بہترین طبی امداد کی فراہمی کی ہدایت کرتے ہوئے ان کی جلد صحت یابی کے لیے دعا کی۔