وزیراعظم سے چینی نائب صدر کی ملاقات مفاہمتی یادداشتوں پر دستخط

وزیر اعظم عمران خان سے چین کے نائب صدر وانگ کشان نے ملاقات کی جس میں پاکستان اور چین کے درمیان مختلف مفاہمتی یادداشتوں پر دستخط کیے گئے جب کہ صدر مملکت نے مہمان کو نشان پاکستان بھی عطا کیا۔

ایکسپریس نیوز کے مطابق چین کے نائب صدر وانگ کشان وفد کے ہمراہ 3 روزہ دورے پر پاکستان پہنچ گئے، نور خان ہوائی اڈے پر وزیر خارجہ شاہ محمود قریشی اور وزیر منصوبہ بندی خسرو بختیار نے ان کا خیر مقدم کیا بعد ازاں چینی نائب صدر نے وزیر اعظم عمران خان اور صدر مملکت ڈاکٹر عارف علوی سے علیحدہ علیحدہ ملاقاتیں کیں۔

چینی نائب صدر نے وزیر اعظم عمران خان سے وفد کے ہمراہ ملاقات کی دونوں جانب سے مختلف امور پر مذاکرات کیے گئے بعدازاں مختلف مفاہمتی یادداشتوں پر دستخط کیے گئے۔




چینی نائب صدر وانگ کشان نے ایوان صدر میں صدر مملکت ڈاکٹر عارف علوی سے بھی ملاقات کی جس میں صدر مملکت نے چینی نائب صدر وانگ کشان کو نشان پاکستان عطاء کیا۔

دریں اثنا فرینڈز آف سلک روڈ سیمینار سے خطاب میں چینی نائب صدر کا کہنا تھا کہ دونوں ممالک تمام بین الاقوامی معاملات پر ایک دوسرے کو سپورٹ کرتے ہیں۔