ورلڈکپ کیلیے انگلینڈ میں موجود پاکستانی کرکٹرز کی قوم کو عید کی مبارکباد

تمام پاکستانیوں اور دنیا بھر کے مسلمانوں کوعید کی خوشیاں مبارک ہو، محمد حفیظ - فوٹو: پی سی بی

---

ورلڈکپ کے لیے انگلینڈ میں موجود پاکستانی کرکٹرز نے عیدالفطر ناٹنگھم میں منائی جب کہ اس موقع پر کرکٹرز نے قوم کو عید کی مبارکباد بھی دی۔

پی سی بی کی جانب سے جاری کی جانے والی ویڈیو میں کھلاڑیوں کو ہوٹل سے گاڑی میں سوار ہوکر نماز عید ادا کرنے کےلیے جاتا دکھایا گیا ہے، اس دوران بس میں موجود تمام کرکٹرز انتہائی خوش اور قوم کو عیدالفطر کی مبارکباد پیش کرتے نظر آتے ہیں۔ تمام پاکستانی کھلاڑی اور آفیشلز ایک دوسرے کے گلے مل کر خوشی کا اظہار بھی کررہے ہیں۔

شعیب ملک نے پورے پاکستان کو اس موقع پر مبارکباد پیش کرتے ہوئے نیک خواہشات کا اظہار کیا، انگلینڈ کے خلاف میچ کے بہترین کھلاڑی قرار پانے والے محمد حفیظ نے کہا کہ میری طرف سے تمام پاکستانیوں، مسلمانوں اور پوری دنیا کے انسانوں کو عید کی خوشیاں مبارک ہو،پی سی بی کی جانب سے جاری کی جانے والی ویڈیو میں بابر اعظم اور دیگر کے پیغامات بھی شامل ہیں، عید پر ٹیم نے ناٹنگھم میں ہی ایک گروپ فوٹو بھی بنوایا جس میں تمام کھلاڑی پر مسرت دکھائی دے رہے ہیں۔