خوب آرام کے بعد ’’کماؤپوت‘‘ بھارت کی مہم کا آج آغاز

آئی پی ایل کی تھکن اتارنے کے بعد پلیئرز ساؤتھمپٹن میں جنوبی افریقہ سے نبردآزما

Sports Desk June 05, 2019

نیوزی لینڈ اور بنگلہ دیش کا مقابلہ،ٹائیگرز ایک اور حیران کن کامیابی کیلیے پُرامید۔ فوٹو:فائل

ورلڈ کپ میں کئی ٹیمیں 2،2 میچز میں کھیل چکیں اور اب خوب آرام کے بعد''کماؤپوت'' بھارت کی مہم کا بدھ کو آغاز ہوگا۔

اپنے ملک میں مسلسل آئی پی ایل کھیلنے کے بعد انگلینڈ آنے والی بھارتی ٹیم کو ورلڈ کپ کا شیڈول بنانے والوں کی مہربانی سے آرام کا مکمل موقع فراہم کیا گیا، اب ایونٹ کے ساتویں روز ویرات کوہلی الیون میدان سنبھالے گی، دلچسپ بات یہ ہے کہ اس کے مدمقابل جنوبی افریقی ٹیم ایونٹ میں اپنا تیسرا میچ کھیلے گی، اسے ابتدائی2 میچز میں بالترتیب انگلینڈ اور بنگلہ دیش سے شکست ہوچکی۔

بلو شرٹس کو ایونٹ کی متوازن ترین ٹیموں میں سے ایک قرار دیا جارہا ہے، ہمیشہ کی طرح مضبوط بیٹنگ لائن اس کی قوت اور بولنگ اٹیک بھی کافی بہتر ہوچکا ہے، ٹیم شاندار آغاز کیلیے پُراعتماد ہے۔ دوسری جانب پروٹیزکو فٹنس مسائل کا سامنا ہے، اگرچہ اوپنر ہاشم آملا میدان میں اترنے کیلیے فٹ قرار دیے جا چکے تاہم فاسٹ بولر لونگی نگیڈی ہیمسٹرنگ کی وجہ سے دستیاب نہیں ہوں گے، ڈیل اسٹین ایونٹ سے ہی باہر ہوچکے ہیں، ٹیم کیلیے ناکامیوں کی دلدل سے باہر آنا کسی چیلنج سے کم نہیں ہوگا۔

موسم ابر آلود اور ہلکی بارش کی پیشگوئی موجود ہے، وکٹ بیٹنگ کیلیے موزوں قرار دی جا رہی ہے۔

ادھر اوول لندن میں بلند حوصلہ بنگلہ دیش کا مقابلہ نیوزی لینڈ سے ہوگا، دونوں ہی ٹیمیں اپنا پہلا میچ جیت چکی ہیں، کیویز نے آئی لینڈرز کو زیر کیا تھا، اب دونوں کی نگاہیں اپنے پوائنٹس کو ڈبل کرنے پر مرکوز ہیں، بادل چھائے رہیں گے جس سے بولرز کو مدد مل سکتی ہے،پچ بیٹسمینوں کیلیے سازگار ہوگی، بارش کا امکان بہت کم ظاہر کیا گیا ہے۔