سلمان خان نے سیکڑوں لوگوں کے سامنے سیکیورٹی گارڈ کو تھپڑ دے مارا

تھپڑ مارنے کی وڈیو وائرل ہونے پر سلمان خان پر تنقید کی جانے لگی ہے فوٹو: فائل

---

بالی ووڈ سپر اسٹار سلمان خان نے اپنی نئی فلم 'بھارت' کے پریمئیر کے موقع پر آئے بچے سے بدسلوکی پر سیکڑوں مداحوں کے سامنے اپنے سیکیورٹی گارڈ کو تھپڑ دے مارا۔

سلمان خان بالی ووڈ کے ایسے اداکار ہیں جو اپنے غصے کی بدولت ہمیشہ سرخیوں میں رہتے ہیں، ایسا ہی ایک واقعہ ان کی نئی فلم ''بھارت'' کے پریمئیر کے موقع پر بھی پیش آیا جب انہوں نے اپنے ہی سیکیورٹی گارڈ کو سیکڑوں مداحوں کی موجودگی میں تھپڑ دے مارا۔

سوشل میڈیا پر وائرل ہونے والی وڈیوز میں دیکھا جاسکتا ہے کہ سلمان خان اپنی نئی فلم ''بھارت'' کے پریمئیر میں شرکت کے لیے آرہے ہیں، انہیں دیکھنے کے لیے مداحوں کی بھی بڑی تعداد موجود ہے، ان کی آمد کے ساتھ ہی مداحوں میں جوش و جذبہ بھی بڑھ جاتا ہے اور سیکیورٹی گارڈ انہیں سلمان خان سے دور رکھنے کی کوشش کرتے ہیں، اسی دوران سلمان خان اپنے ایک سیکیورٹی گارڈ کو زناٹے دار تھپڑ رسید کرتے ہیں اور سینما گھر کی جانب چلے جاتے ہیں۔

https://twitter.com/heartgetshurt/status/1136229512503484418

بھارتی میڈیا کے مطابق سلمان خان نے اس سیکیورٹی گارڈ کو تھپڑ وہاں ان سے ملاقات کے لیے آنے والے بچے سے کی گئی بدسلوکی پر مارا ۔ واقعے کی وڈیو وائرل ہوتے ہی سلمان خان کو اس حرکت پر حق بجانب قرار دیا جارہا ہے، وہیں ان کی تنقید بھی جارہی ہے۔