شہباز شریف کی وطن واپسی کی نئی تاریخ کا اعلان کر دیا گیا

شہباز شریف 10 اپریل کو طبی معائنے کے لیے برطانیہ روانہ ہوئے تھے فوٹو: فائل

---

قومی اسمبلی میں قائد حزب اختلاف اور مسلم لیگ (ن) کے صدر شہباز شریف کی وطن واپسی کی نئی تاریخ کا اعلان کر دیا گیا ہے جس کے مطابق اب وہ 11 جون کی بجائے 8 جون کو وطن واپس پہنچیں گے۔

قائد حزب اختلاف اور مسلم لیگ (ن) کے صدر شہباز شریف کے بیٹے سلیمان شہباز نے ٹوئٹر پیغام میں اپنے والد شہباز شریف کی واپسی کی تاریخ کا اعلان کیا ہے جس میں کہا گیا ہے کہ شہباز شریف 8 جون کو وطن واپس لوٹیں گے۔

پارٹی ذرائع کے مطابق سابق وزیراعلی پنجاب شہباز شریف کے پہلے سے کئے گئے طبی ٹیسٹوں کی رپورٹس 7 جون تک آ جائیں گی جس کے بعد شہباز شریف پُر امید ہیں کہ ان کے معالج ان کو سفر کی اجازت دے دیں گے اور وہ 8 جون کو وطن واپس پہنچ جائیں گے۔

شہباز شریف کے وکیل اس سے قبل احتساب عدالت کو یقین دہانی کراچکے ہیں کہ ان کے موکل 11 جون تک وطن واپس آجائیں گے اور عدالت میں پیش ہوں گے۔

Mian Shahbaz Sharif returning back on 8th of June Inshallah pic.twitter.com/XoYNgTPajO

— Suleman Sharif (@SulemanSharif82) June 5, 2019

واضح رہے کہ شہباز شریف 10 اپریل کو اپنے طبی معائنے کے لیے برطانیہ روانہ ہوئے تھے، ان کے بیرون ملک قیام کو مبینہ طور پر خفیہ ڈیل کا نتیجہ قرار دیا جارہا تھا۔