اپنی واپسی سے متعلق جھوٹی خبریں پھیلانے والوں کے خلاف قانونی کارروائی کروں گا شہباز شریف

حکومت نے ظلم و زیادتی کا راستہ اپنایا ہوا ہے، شہباز شریف. فوٹو:فائل

---

قومی اسمبلی کے اپوزیشن لیڈر شہباز شریف کا کہنا ہے کہ میری وطن واپسی سے متعلق بے بنیاد خبریں پھیلائی گئیں، جھوٹی خبریں پھیلانے والوں کے خلاف قانونی کارروائی کروں گا۔

ایکسپریس نیوز کے مطابق قومی اسمبلی میں قائد حزب اختلاف شہباز شریف علاج کے بعد کل وطن واپس پہنچ رہے ہیں، وطن واپسی کے موقع پر لندن کے ہیتھرو ایئرپورٹ پر میڈیا سے غیر رسمی بات کرتے ہوئے شہباز شریف کا کہنا تھا کہ میرے تمام میڈیکل ٹیسٹ کلیئر ہیں، ڈاکٹرز کی اجازت اور مشاورت کے بعد وطن واپسی کا فیصلہ کیا۔

شہباز شریف کا کہنا تھا کہ میری وطن واپسی سے متعلق بے بنیاد خبریں پھیلائی گئیں، جھوٹی خبریں پھیلانے والوں کے خلاف قانونی کارروائی کروں گا، پارلیمنٹ کے اندر بھی احتجاج کریں گے، پرسوں قومی اسمبلی کےاجلاس میں اپوزیشن جماعتوں سے مشاورت ہوگی اور آئندہ کا لائحہ عمل طےکریں گے۔

قائد حزب اختلاف نے کہا کہ حکومت نے ظلم و زیادتی کا راستہ اپنایا ہوا ہے، 3 مرتبہ وزیراعظم رہنے والے کے لیے حکومت سرد مہری کا مظاہرہ کررہی ہے۔