ایشین بیچ ہینڈ بال قومی ٹیم بدھ کو چین جائیگی

چیمپئن شپ 15سے 22 جون تک شیڈول ، حکام کو وکٹری اسٹینڈ تک رسائی کی امیدیں

Sports Reporter June 09, 2019

چیمپئن شپ 15سے 22 جون تک شیڈول ، حکام کو وکٹری اسٹینڈ تک رسائی کی امیدیں۔ فوٹو:سوشل میڈیا

پاکستان کی 12 رکنی قومی ہینڈ بال ٹیم چھٹی ایشین بیچ ہینڈبال چیمپئن شپ میں حصہ لے گی جب کہ چیمپئن شپ 15 سے 22 جون تک چین کے شہر وی ای آئی میں شیڈول ہے۔

پاکستان ہینڈبال فیڈریشن کے صدر محمد شفیق کے مطابق چیمپئن شپ میں پاکستان کے وکٹری اسٹینڈ تک رسائی پانے کا قوی امکان ہے، چیمپئن شپ کے حوالے سے تفصیلات بتاتے ہوئے انہوں نے کہا کہ 12 ممالک کے درمیان کھیلے جانے ان مقابلوں میں قطر اپنے اعزاز کا دفاع کریگا جبکہ دیگر ممالک میں جاپان، فلپائن، تھائی لینڈ، ویت نام، چائنیز تائپے، ایران ، اومان، سعودی عرب، انڈونیشیا، پاکستان اور افغانستان شامل ہیں۔

میزبان ہونے کے باوجود چین چیمپئن شپ میں شریک نہیں ہورہا، ایونٹ میں شرکت کے لیے 12 رکنی قومی ٹیم میں 10 کھلاڑیوں کے ساتھ 2 آفیشلز بھی چین جائیں گے۔

ایشیا ہینڈ بال فیڈریشن میں سیکریٹری جنرل کے عہدے پر فائزمحمد شفیق نے کہا کہ ایشین بیچ ہینڈ بال ایونٹ میں دلچسپ لیکن سخت مقابلے متوقع ہیں، تاہم سابقہ کارکردگی کو مدنظر رکھتے ہوئے کہا جاسکتا ہے کہ پاکستان وکٹری اسٹینڈ تک پہنچنے میں ضرور کامیاب رہے گا، گزشتہ چیمپئن شپ میں پاکستان نے سلور میڈل اپنے نام کیا تھا۔