امیتابھ بچن اور ریکھا کا فلم ویلکم بیک میں ایکساتھ کام کرنے کا امکان

فلم کے ہدایت کار انیس بزمی اور پروڈیوسر فیروز نڈیاڈ والا فلم میں امیتابھ بچن اور ریکھا کو ایک ساتھ کاسٹ کرنا چاہتے ہیں۔

---

COLOMBO: ماضی کی سپر ہٹ جوڑی اور اپنے عشق کی وجہ سے خبروں میں رہنے والے امیتابھ بچن اور ریکھا کا ایک بار پھر انیس بزمی کی فلم ویلکم بیک میں ایک ساتھ کاسٹ کئے جانے کا امکان ہے۔

ویلکم بیک 2007 میں ریلیز ہوئی فلم ویلکم کا سیکیول ہے اور فلم کے ہدایت کار انیس بزمی اور پروڈیوسر فیروز نڈیاڈ والا فلم میں امیتابھ بچن اور ریکھا کو ایک ساتھ کاسٹ کرنا چاہتے ہیں اور اس حوالے سے فلم کے پروڈیوسرز نے بگ بی سے رابطہ کر کے انہیں گزشتہ فلم میں فیروز خان کا ادا کردہ کردار آر ڈی ایکس آفر کر دیا ہے تاہم ابھی اس حوالے سے امیتابھ بچن سے بات چیت جاری ہے۔

انیس بزمی نے فلم میں ریکھا کو کاسٹ کرنے کے حوالے سے کہا کہ ریکھا سے فلم میں کام کرنے کے لئے ابھی تک کوئی رابطہ نہیں کیا گیا تاہم وہ چاہتے ہیں کہ فلم میں ریکھا کو کاسٹ کیا جائے کیونکہ وہ ریکھا کے بہت بڑے مداح ہیں اور ان کے ساتھ کام کرنے کے بھی خواہشمند ہیں، انہوں نے کہا کہ یہ فلم کامیڈی ہے اور ریکھا کی کامیڈی ٹائمنگ بہترین ہےلہذاٰ وہ یہ سمجھتے ہیں کہ ریکھا اس کردار کے ساتھ بھرپور انصاف کریں گی۔ انیس بزمی کا کہنا ہے کہ اس کردار کے لئے ریکھا کے علاوہ 4 اور نام بھی زیر غور ہیں۔

امیتابھ بچن اور ریکھا نے ماضی میں کئی سپر ہٹ فلمیں دیں اور اس دوران ان کے عشق کے چرچے بھی رہے، دونوں کی فلموں میں "دو انجانے"، "مقدر کا سکندر"، "مسٹر نٹور لال"، "سہاگ" اور "سلسلہ" شامل ہیں۔