حکومتی سرپرستی میں قائم پی او اے کے عہدیداروں کا ایسوسی ایشن کے دفتر پر قبضہ

حکومتی سرپرستی میں قائم پی او اے کے عہدے داروں نے پاکستان اولمپک ایسوسی ایشن کے دفتر پر قبضہ کر لیا ہے۔

ایکسپریس نیوز کے مطابق خواجہ فاروق سعید اور ظفر عباس لک کی قیادت میں ٹمپل روڈ پر واقع پاکستان اولمپک ایسوسی ایشن کے دفتر پر قبضہ کرنے والے گروپ نے دفتر میں گھس کر عارف حسن کی پی او اے کے بیشتر اسٹاف کو باہر نکال دیا جبکہ کچھ کو کمروں میں بند کردیا اور دفتر پر قابض ہوگئے۔


دوسری جانب ذرائع کے مطابق عارف حسن نے دفتر پر قبضے سے متعلق انٹرنیشنل اولمپک کمیٹی کو آگاہ کردیا ہے جس کے بعد پاکستان کے خلاف سخت ایکشن کا امکان ہے اور حکومت کے اس اقدام پر آئی او سی پاکستان پر پابندی بھی لگاسکتی ہے۔

واضح رہے کہ عرصہ دراز سے عارف حسن کی پی او اے اور اسلم ساہی کی پی او اے میں سیاسی چپقلش چل رہی ہے۔