پاک بھارت میچ بھی بارش کی نذر ہونے کا خطرہ

ٹکٹوں کی 4 گنا مہنگے داموں فروخت، بقا کی جنگ لڑنے والے گرین شرٹس ٹاؤنٹن سے مانچسٹر پہنچ گئے۔ فوٹو؛ فائل

---

پاک بھارت میچ بھی بارش کی نذر ہونے کا خطرہ پیدا ہوگیا۔

ورلڈکپ کی اولین مہم میں پاکستانی بیٹنگ بری طرح فلاپ ہوئی اور ویسٹ انڈیز نے باآسانی 7وکٹ سے کامیابی حاصل کی، دوسرے میچ میں گرین شرٹس نے انگلینڈ کے خلاف عمدہ بیٹنگ کے بعد بولنگ میں بھی بہتر کارکردگی کا مظاہرہ کرتے ہوئے 14رنز سے فتح پائی، سری لنکا کو ہرانے کا موقع بارش کی وجہ سے ضائع ہونے کے بعد ایک پوائنٹ پر اکتفا کرنا پڑا۔

بدھ کو آسٹریلیا کیخلاف میچ میں پاکستانی بولرز ابتدا میں وکٹیں لے پائے نہ رنز روک سکے، فیلڈرز نے کیچز بھی چھوڑے، محمد عامر اور وہاب ریاض نے آخر میں عمدہ بولنگ سے کینگروز کو 307تک محدود کیا تو چند بیٹسمین اچھے آغاز کو بڑے اسکور میں بدلنے میں ناکام رہے۔

شعیب ملک اور آصف علی بھی غیر ذمہ دارانہ اسٹروکس کھیل کے ٹیم کی کشتی بیچ منجدھار چھوڑ گئے، وہاب ریاض اور حسن علی نے خلاف توقع کینگروز کی دھلائی کرتے ہوئے فتح کی امید دلائی لیکن مشن مکمل نہ کرپائے۔

اب پاکستان کا اگلا معرکہ بھارت کے ساتھ مانچسٹر کے اولڈ ٹریفورڈ اسٹیڈیم میں اتوار کو ہوگا، بھارتی ٹیم نے جنوبی افریقہ کو 6وکٹ سے مات دینے کے بعد آسٹریلیا کو 36 رنز سے شکست دی، جمعرات کو بھارت اور نیوزی لینڈ کا مقابلہ بارش کی وجہ سے منسوخ ہوگیا، دونوں ٹیموں کو ایک ایک پوائنٹ ملا، بھارتی ٹیم 5پوائنٹس کیساتھ تیسرے نمبر پر ہے، ایک میچ بارش کی نذر ہونے جبکہ 2میں ناکامی کے بعد پاکستان 3پوائنٹس کیساتھ آٹھویں پوزیشن پر اور سیمی فائنل تک رسائی کا سفر دشوار ہوتا جارہا ہے۔

بھارت کیخلاف میچ میں فتح گرین شرٹس کی امیدوں کے چراغ روشن کرسکتی ہے لیکن بارش رنگ میں بھنگ ڈال سکتی ہے، اس وقت مانچسٹر میں بارشوں کا سلسلہ جاری اور برطانوی محکمہ موسمیات نے اتوار کو بھی بارش کی پیش گوئی کی ہے۔ صبح 10 بجے سے بارش کے 50 فیصد امکانات ہیں۔

یاد رہے کہ ڈے میچ مقامی وقت کے مطابق10.30پر شروع ہوگا، اس وقت پاکستان میں ڈھائی بجے ہوں گے، روایتی حریفوں کے مقابلوں کو کرکٹ کی جان کہا جاتا ہے۔

اس بار ورلڈکپ کے اس ہائی وولٹیج مقابلے کو دیکھنے کے خواہشمند لاکھوں شائقین میں سے چند ہزار خوش نصیب ہی ٹکٹ حاصل کرپائے، اتوار کو دنیا بھر سے شائقین کی مانچسٹر آمد متوقع ہے، بلیک میں ٹکٹ 4 گنا قیمت پر فروخت ہو رہے ہیں مگر ٹیموں کو ایکشن میں دیکھنے کے خواہشمند بڑی خوشدلی سے جیب پر اضافی بوجھ برداشت کرنے کو تیار اور موسم کی مداخلت نہ ہونے کی دعا بھی کررہے ہیں۔

پاکستان ٹیم گزشتہ روز ہی مانچسٹر پہنچ گئی تھی، جمعے کی صبح 10سے ایک بجے تک پریکٹس سیشن میں اپنی خامیوں پر قابو پانے کی کوشش کرے گی،کینگروز کی لیگ اسپن اور گگلی بولنگ پر کمزوریوں کے باوجود شاداب خان کو ڈراپ کرکے شاہین شاہ آفریدی کو شامل کرنے کے ناکام تجربے کو سخت تنقید کا نشانہ بنایا گیا تھا، بھارت کیخلاف میچ میں نوجوان لیگ اسپنر کی پلیئنگ الیون میں واپسی ہوگی۔