بنارس کالونی میں جامعہ کراچی کی بس کو لوٹ لیا گیا

پوائنٹ کو لوٹنے والے ملزمان کی تعداد 5 تھی پولیس فوٹو: فائل

---

اورنگی ٹاؤن کے علاقے پیر آباد میں نامعلوم ڈاکو جامعہ کراچی کے پوائنٹ کو یرغمال بنانے کے بعد اس میں موجود درجنوں طلبا کو لوٹ کر بااآسانی فرار ہوگئے۔

کراچی میں چلتے راہگیروں اور مسافر بسوں کو لوٹنا تو معمول کی بات بن گئی ہے لیکن اب ڈاکو دن دیہاڑے جامعات کی بسوں تک کو یرغمال بنا رہے ہیں، پیر آباد کے قریب جامعہ کراچی کی پوائنٹ بس جیسے ہی بنارس پل پہنچی تو مسلح افراد نے اسے گھیرلیا اور بس میں سوار ہوکر درجنوں طلبا کے موبائل اور نقدی لوٹ کر فرار ہوگئے۔

پولیس کے مطابق ملزمان کی تعداد 5 تھی جبکہ طلبا نے ڈکیتی کی واردات کے خلاف بنارس کے قریب شدید احتجاج کیا اور سٹرک کو ٹریفک کے لیے بند کرکے پولیس کے خلاف نعرے بازی بھی کی تاہم پولیس کی جانب سے ڈاکوؤں کو پکڑنے کی یقین دہانی کے بعد طلبا پرامن طور پر منتشر ہوگئے۔