فیصل آباد کراچی جانے والی ملت ایکسپریس سے اسلحے سے بھرا بیگ برآمد

برآمد کئے جانے والے اسلحے میں 8 ایم ایم گن، 3 پستولیں، 100 سے زائد گولیاں اور 11 میگزینز شامل ہیں، پولیس فوٹو: ایکسپریس

---

پولیس کو سرگودھا سے کراچی جانے والی ملت ایکسپریس سے اسلحے سے بھرا ایک بیگ ملا جس میں 8 ایم ایم گن، 3 پستولیں، 100 سے زائد گولیاں اور 11 میگزینز شامل ہیں۔

سرگودھا سے کراچی جا نے والی ملت ایکسپریس جب فیصل آباد اسٹیشن پر رکی تو ریلوے پولیس اور ایجنسیوں کےاہلکاروں نے سراغ رساں کتوں کی مدد سے ٹرین کی تلاشی لی تو بوگی نمبر 16 کی برتھ نمبر 5 سے اسلحے سے بھرا بیگ برآمد ہوا،پولیس نے ایک شخص کو حراست میں لے لیا جس کا نام رئیس بتایا جاتا ہے۔

گرفتار شخص نے ابتدائی تفتیش کے دوران بتایا کہ وہ سرگودھا کے علاقے شاہ پور کا رہائشی ہے اور کراچی میں کام کرتا ہے، اس کا کہنا تھا کہ یہ اسلحہ اس کا نہیں ہے اور وہ تو اپنے اہل خانہ کے پاس چھٹیاں منانے کیلئے سرگودھا آیا تھا جس کے بعد وہ واپس کراچی جا رہا تھا،ذرائع کے مطابق اس بوگی میں ایک خاتون بھی بیٹھی تھیں اور جب پولیس نے اس شخص کو حراست میں لیا تو خاتون باآسانی فرار ہونے میں کامیاب ہوگئی۔