قومی ٹیم کی بدترین کارکردگی پر فیکٹ فائنڈنگ کمیشن بنانے کے لیے درخواست دائر

عدالت سلیکشن کمیٹی سے ٹیم سلیکشن کا طریقہ کار طلب کرے، درخواست میں استدعا

ویب ڈیسک June 22, 2019

وزیراعظم عمران خان نے ٹیم کے کچھ کھلاڑیوں کو ریلوکٹا کہا،درخواست میں موقف فوٹو: فائل

پاکستان کرکٹ ٹیم کی ورلڈ کپ میں بدترین کارکردگی اور سلیکشن کے عمل کے خلاف اسلام آباد ہائی کورٹ میں درخواست دائر کی گئی ہے۔

بلال فاروقی ایڈووکیٹ کی جانب سے اسلام آباد ہائی کورٹ میں پاکستان کرکٹ ٹیم کی ورلڈ کپ میں بدترین کارکردگی اور سلیکشن کے عمل کے خلاف درخواست دائر کی گئی ہے ، جس میں موقف اختیار کیا گیا ہے کہ وزیراعظم عمران خان نے ٹیم کے کچھ کھلاڑیوں کو ریلوکٹا کہا، وزیراعظم کے بیان کے مطابق پی سی بی اور سلیکشن کمیٹی ناکام ہوگئی۔ قومی ٹیم میں شعیب ملک کی گروپنگ کرنے کی خبریں عام ہیں پھر بھی ان کی سلیکشن سمجھ سے بالاترہے۔

درخواست میں استدعا کی گئی ہے کہ عدالت سلیکشن کمیٹی سے ٹیم سلیکشن کا طریقہ کار طلب کرے، وزیراعظم کو سلیکشن کمیٹی کے خلاف کارروائی کا حکم دیا جائے، موجودہ ورلڈ کپ ٹیم میں گروپنگ کی خبروں پر فیکٹ فائنڈنگ کمیشن بنایا جائے، شعیب اختر، راشد لطیف اور محمد وسیم کو عدالتی معاونت کے لیے طلب کیا جائے۔