سرفراز کی حمایت میں بھارتی اداکار رتیش دیش مُکھ میدان میں آگئے

تاریخ میں ہر کپتان نے اپنے کیریئر میں اہم میچ میں شکست حاصل کی ہے، اداکار کا ٹوئٹ فوٹوفائل

---

ISLAMABAD: بالی ووڈ اداکار رتیش دیش مکھ نے قومی ٹیم کے کپتان سرفراز احمد کی حمایت میں ٹوئٹ کرتے ہوئے کہا ہے کہ سرفراز احمد کو ہراساں کرنا بند کیا جائے۔

ورلڈ کپ میں بھارتی ٹیم کے ہاتھوں شکست کے بعد پاکستانی ٹیم کا برا حال ہے ، میچ کے دوران مایوس کن کارکردگی دکھانے کے باعث قومی ٹیم کا کہیں آنا جانا بھی دشوار ہوگیا ہے۔

حال ہی میں کپتان سرفراز احمد کی ویڈیو وائرل ہوئی تھی جس میں ایک شخص سرفراز کے لیے بھارت کے ہاتھوں شکست پر نہایت ناشائستہ زبان استعمال کرتا نظر آرہا ہے جب کہ اس شخص کو یہ خیال بھی نہیں کہ کپتان کے ساتھ ان کا بچہ بھی موجود ہے، تاہم سرفراز جواب دئیے بغیر وہاں سے چلے گئے۔

یہ ویڈیو منظرعام پر آنے کے بعد شائقین کرکٹ کپتان کی حمایت کرنے کے ساتھ ویڈیو میں موجود شخص کے ناشائستہ زبان استعمال کرنے پر غصے کا اظہار کررہے ہیں۔ کپتان کی حمایت کرنے والوں میں بالی ووڈ اداکار رتیش دیش مکھ بھی شامل ہیں جنہوں نے ٹوئٹر پر سرفراز کی حمایت میں آوازاٹھاتے ہوئےاس ویڈیو پر شدید تنقید کی ہے۔

رتیش دیش مکھ نے کہا ''تاریخ میں ہر کپتان نے اپنے کیریئر میں اہم میچ میں شکست حاصل کی ہے۔ سرفراز احمد اس طرح کے رویے کے مستحق نہیں، یہ ہراسانی ہے، یہ تو دیکھیں کہ ان کے ساتھ ان کا بچہ بھی موجود ہے۔''

Every captain in history has lost an important match. #SarfarazAhmed doesn’t deserve this. This is harassment... for heaven’s sake he is with his child. https://t.co/JU8YFKMPyg

— Riteish Deshmukh (@Riteishd) June 22, 2019