پیرس ایئرشو کے اختتامی روز جے ایف 17 تھنڈر کی دھوم

مظاہرے کے بعد طیارے کی لینڈنگ پر شائقین نے تالیاں بجا کر اس کی شاندار پرفارمنس پر داد دی

Staff Reporter June 24, 2019

پیرس ایئرشو کے اختتامی روز جے ایف17 تھنڈر کی دھوم

MILAN: 53 ویں پیرس ایئر شو کے اختتامی روز ایوی ایشن کے شائقین کی ایک بڑی تعداد نے پاک فضائیہ کے جے ایف17 تھنڈر کا اسٹیٹک ڈسپلے اور فضائی مظاہرہ دیکھا، ہفتہ وار تعطیل کی وجہ سے دن کے آغاز میں ہی نمائش کا وسیع و عریض میدان ہر عمرکے پرجوش تماشائیوں سے بھرگیا، دیگر جہازوں اور دفاعی سازوسامان کے درمیان رکھا گیا جے ایف 17 تھنڈر اس شو میں نمایاں حیثیت اختیار کر گیا۔

پاک فضائیہ کے عملے نے ایوی ایشن کے شائقین کو اس طیارے کی آپریشنل صلاحیتوں اور اس کے جدید ترین ہتھیاروں کے بارے میں آگاہ کیا، پاکستان کے اس شاہکار طیارے کو اپنے سامنے دیکھ کر عوام کی خوشی دیدنی تھی، انھوں نے پاک فضائیہ کے عملے کے ساتھ سیلفیز اور تصاویر بنوائیں، اسٹیٹک ڈسپلے کے علاوہ پاکستان ایروناٹیکل کمپلیکس کامرہ میں تیار کردہ جے ایف 17 تھنڈر نے شاندار الوداعی فضائی مظاہرہ پیش کیا، پیرس کے آسمانوں میں طیارے کے مسحور کن فضائی مظاہرے سے شائقین بہت محظوظ ہوئے۔

مظاہرے کے بعد طیارے کی لینڈنگ پر شائقین نے تالیاں بجا کر اس کی شاندار پرفارمنس پر داد دی، دنیا کے سب سے بڑے ایئر شو میں پاک فضائیہ کے دستے کی شمولیت سے جے ایف 17 تھنڈر کی جدید ترین صلاحیتوں کو ظاہر کرنے کا بہترین موقع میسر آیا اور ایوی ایشن کی عالمی منڈی میں ممکنہ خریداروں کو جے ایف 17تھنڈر کی صلاحیتوں کو پرکھنے کا موقع بھی فراہم ہوا ہے۔