کراچی میں نیشنل ہائی وے پر ٹرک گاڑی پر الٹ گیا 2 افراد جاں بحق ایک شخص زخمی

حادثے کے بعد نیشنل ہائی وے لنک روڈ پر شدیدٹریفک جام ہوگیا۔ فوٹو: ایکسپریس نیوز

---

نیشنل ہائی وے لنک روڈ پر تیز رفتاری کے باعث کنٹینر لدا ٹرک گاڑی پر الٹ گیا جس کے نتیجے میں 2 افراد جاں بحق جب کہ ایک شخص شدید زخمی ہوگیا۔

ایکسپریس نیوز کے مطابق کنٹینر لدا ٹرک نیشنل ہائی وے لنک روڈ سے گزر رہا تھا کہ اچانک تیز رفتاری کے باعث لڑکھڑا کر ڈبل کیبن گاڑی پر الٹ گیا جس کے نتیجے میں گاڑی مکمل طور پر تباہ ہوگئی اور اس میں سوار 3 افراد ٹرک کے نیچے دب گئے، لوگوں نے اپنی مدد آپ کے تحت تقریباً ایک گھنٹے کی جدوجہد کے بعد تینوں افراد کو باہر نکالا تو اس دوران 2 افراد جاں بحق ہوچکے تھے جبکہ تیسرا شخص شدید زخمی تھا جسے جناح اسپتال منتقل کردیا گیا۔

حادثے کے بعد نیشنل ہائی وے لنک روڈ پر شدید ٹریفک جام ہوگیا تاہم امدادی ٹیموں نے الٹنے والے ٹرک اور دبی ہوئی گاڑی کو روڈ سے ہٹادیا جس کے بعد نیشنل ہائی وے پر ٹریفک کی روانی بحال ہوگئی۔