حج پروازوں کا آغاز ہوگیا ملک بھر سے عازمین حج کی روانگی شروع

پاکستانی عازمین کو حجاز مقدس پہنچانے کے لئے پری حج آپریشن 9 اکتوبر تک جاری رہے گا. فوٹو: فائل

---

ملک بھر سے فریضہ حج کی ادائیگی کے لئے جانے والے عازمین کی روانگی کا باقاعدہ آغاز ہوگیا ہے اس سلسلے میں پہلی حج پرواز پشاور سے روانہ کردی گئی ہے۔

پشاور کے باچا خان انٹرنیشنل ایئرپورٹ سے پہلی حج پرواز 368 عازمین کو لے کر جدہ روانہ ہوگئی ۔ فریضہ حج ادا کرنے جانے والے یہ عازمین نجی ایئرلائن کی پرواز کے ذریعے روانہ ہوئے ہیں جبکہ سرکاری ایئر لائن پیر سے اپنے آپریشن کا آغاز کرے گی۔

وزارت حج کے مطابق ایک لاکھ 43 ہزار پاکستانی عازمین کو حجاز مقدس پہنچانے کے لئے پری حج آپریشن 9 اکتوبر تک جاری رہے گا، پی آئی اے کے ذریعے مجموعی طور پر 70 ہزار عازمین حج کو 160پروازوں کے ذریعے سعودی عرب پہنچایا جائے گا جبکہ دیگر مسافر نجی اور غیر ملکی ایےر لائنز کے ذریعے حجاز مقدس پہنچیں گے۔