وزیرداخلہ پی پی کی ناراضگی پرمخدوم امین فہیم کو اے پی سی میں بلانے کیلئے متحرک

وزیرداخلہ چوہدری نثار علی خان پیپلز پارٹی کی ناراضگی پر مخدوم امین فہیم کو آل پارٹیز کانفرنس میں مدعو کرنے کے لئے متحرک ہو گئے۔

حکومت نے اے پی سی میں تمام پارٹیز کے صدور کو مدعو کیا لیکن مخدوم امین فہیم کو دعوت نامہ نہیں بھیجا گیا جس پر اپوزیشن لیڈر سید خورشید شاہ نے ناراضگی کا اظہار کرتے ہوئے کہا کہ اگر امین فہیم کو اے پی سی میں شرکت کی دعوت نہ دی گئی تو وہ اے پی سی میں شرکت نہ کرنے پر غور کریں گے۔

خورشید شاہ نے کہا کہ پیپلز پارٹی پارلیمینٹیرینز کے صدر کے طور پرمخدوم امین فہیم کو بھی دعوت ملنی چاہئے تھی۔ اس صورت حال کے بعد وزیر داخلہ چوہدری نثار علی خان نے مخدوم امین فہیم کو مدعو کرنے کیلئے خورشید شاہ سے ان کا نمبر لے لیا ہے۔