ترک بارڈرفورسز کی کوچ پر فائرنگ 10 پاکستانی جاں بحق

جاں بحق ہونیوالوں میں علی پور چٹھہ کاعلی مرتضیٰ بھی شامل، والدین میت کی واپسی کے منتظر ، 25 زخمی زیرحراست فوٹوفائل

---

ترکی سے یونان جاتے ہوئے بارڈرکے قریب ترک سیکیورٹی فورس کی فائرنگ سے کوچ الٹ گئی۔

گولیاں لگنے سے 10 پاکستانی جاں بحق اور 25 زخمی ہو گئے۔ مرنے والوں میں علی پور چٹھہ کا رہائشی 23 سالہ علی مرتضیٰ بھی شامل ہے، علی پور چٹھہ کاعلی مرتضیٰ بہتر مستقبل کی تلاش میں 3سال قبل ترکی گیا تھا، ترکی سے یونان جانے کیلیے دیگر پاکستانیوں کے ہمراہ کوچ میں سوار ہو کر جا رہاتھا، بارڈر کراس کرنے کے دوران سیکیورٹی اہلکاروں کے آتے ہی کوچ کا ڈرائیور خوفزدہ ہو گیا۔

فورسز کے نے کوچ روکنے کا اشارہ کیا مگر ڈرائیور نے کوچ کو بھگا دیا جس پر فورسز نے فائرنگ شروع کر دی، کو چ کا ڈرائیور چلتی گاڑی سے چھلانگ لگا کر فرار ہو گیا، اس دوران تارکین وطن کی بغیر ڈرائیور کوچ ایک عمارت سے جا ٹکرائی، فائرنگ اور کوچ کے ٹکرا نے سے 10 پاکستانی جاں بحق جبکہ 25 دیگر تارکین وطن زخمی ہوئے جنہیں بارڈر فورس نے حراست میں لے لیا۔ علی مرتضیٰ کے جاں بحق ہونے کی اطلاع ترکی میں موجود اس کے ہم پیشہ ساتھیوں نے علی پور چٹھہ میں اس کے والدین کو ٹیلی فون پر دی تاہم ابھی نعش کی واپسی کا کوئی شیڈول سامنے نہیں آیا ہے۔