بے نامی اثاثوں سے متعلق نوٹس میڈیا پر نام ظاہر ہونے سے افسران کو مشکلات

سیاسی شخصیات کے نمائندے بھی دفاتر سے رابطہ کرکے خبر میڈیا پر لیک ہونے کا شکوہ کررہے ہیں۔ فوٹو: فائل

---

حکومت کی جانب سے بے نامی اثاثوں کی ضبطگی سے متعلق نوٹسز میڈیا کو جاری کیے جانے سے ایف بی آرکے افسران عدم تحفظ کا شکارہوگئے ہیں کیونکہ میڈیا کو جاری کردہ نوٹسز میں متعلقہ افسران کے نام وشناخت بھی ظاہر ہوگئی۔

افسران نے شکوہ کیا ہے کہ ایف بی آرافسران پہلے ہی اہم سیاسی کیسز کی وجہ سے عدم تحفظ کا شکار تھے کیونکہ مشکوک افراد ان کی نقل و حرکت پر نظر رکھے ہوئے ہیں لیکن اب بے نامی اثاثوں کے خلاف کاروائی کے نوٹسزباہر آنے اورمیڈیا پر نام ظاہر ہونے سے ایف بی آرافسران کی مشکلات مزید بڑھ گئی ہیں۔

اب سیاسی شخصیات کے نمائندے بھی دفاتر سے رابطہ کرکے خبر میڈیا پر لیک ہونے کا شکوہ کررہے ہیں جس کی وجہ سے افسران شدید نفسیاتی دباؤ کا شکار ہوگئے ہیں۔