لاہور:
کوئٹہ میں انسداد دہشت گردی کی عدالت نے اکبر بگٹی قتل کیس میں سابق صدر پرویز مشرف کو ایک بار پھر پیش کرنے کے احکامات جاری کر تے ہوئے ان کی جانب سے حاضری سے استثنیٰ کی درخواست مسترد کر دی ہے۔
اکبر بگٹی قتل کیس کی سماعت کوئٹہ میں انسداد دہشت گردی کی عدالت میں ہوئی، کیس کی سماعت کے دوران پرویز مشرف کے وکیل نےعدالت سے اپنے موکل کو حاضری سے مستثنیٰ قرار دئیے جانے کی استدعا کی، تاہم عدالت نے اس حوالے سے اپنا پہلا حکم دہراتے ہوئے ایک بار پھرکہا کہ پرویز مشرف اور دیگر نامزد ملزمان کو ہر صورت عدالت میں پیش کیا جائے۔
انسداد دہشت گردی کی خصوصی عدالت نے اکبر بگٹی قتل کیس میں سابق وزیراعظم شوکت عزیز، سابق گورنر اویس احمد غنی اور سابق ڈی سی او ڈیرہ بگٹی عبدالصمد لاسی کے گرفتاری کے احکامات بھی جاری کرتے ہوئے کیس کی سماعت 30ستمبر تک ملتوی کردی ہے۔