مشیر امور خارجہ سرتاج عزیز کی بھارتی وزیر خارجہ سے غیر رسمی ملاقات

نیویارک میں دونوں ممالک کے وزرائے اعظم کی ممکنہ ملاقات کے لئے سازگار ماحول کی ضرورت ہے، سلمان خورشید فوٹو: فائل

---

مشیر امور خاجہ سرتاج عزیز اور بھارتی وزیر خارجہ سلمان خورشید نے کرغیزستان میں شنگھائی تعاون تنظیم کے اجلاس میں شرکت کے موقع پرغیر رسمی ملاقات کی۔

کرغیزستان کے دارالحکومت بشکیک میں ہونے والی اس غیر رسمی ملاقات میں سرتاج عزیز اور سلمان خورشید کے درمیان پاک بھارت تعلقات کو معمول پر لانے کے لئے تبادلہ خیال کیا گیا، بھارتی وزیر خارجہ سلمان خورشید نے میڈیا سے بات کرتے ہوئے کہا کہ انہوں نے سرتاج عزیز کو آگاہ کیا ہے کہ نیویارک میں دونوں ممالک کے وزرائے اعظم کی ممکنہ ملاقات کے لئے سازگار ماحول کی ضرورت ہے۔

سلمان خورشید کا مزید کہنا تھا کہ ملاقات میں ممبئی حملوں کے مجرموں کا معاملہ بھی زیر بحث آیا جب کہ لائن آف کنٹرول پر جنگ بندی کو برقرار رکھنے کے موضوع پر بھی بات کی گئی ہے۔