مودی نے مسئلہ کشمیر کی ثالثی کی بات کرکے ملک کو دھوکا دیا راہول گاندھی

وزارت خارجہ کی تردید سے کام نہیں چلے گا بلکہ وزیراعظم مودی کو اس کا جواب دینا ہوگا، صدر کانگریس

---

کانگرس کے سابق صدر راہول گاندھی کا کہنا ہے کہ مودی نے مسئلہ کشمیر کی ثالثی کی بات کرکے ملک کو دھوکا دیا ہے اور وزیراعظم مودی کو اس کا جواب دینا ہوگا۔

امریکی صدر ڈونلڈ ٹرمپ نے وزیراعظم عمران خان سے ملاقات کے دوران بھارتی وزیراعظم نریندرمودی کی طرف سے مسئلہ کشمیر کے حل کے لیے ثالثی کی بات کرنے کا اظہار کیا تو سارا بھارت آگ بگولہ ہوگیا۔

امریکی صدر کے اس بیان کے بعد مودی سرکار وضاحتیں پیش کررہی ہے اور بھارتی وزیر خارجہ جے سنکر نے راجیہ سبھا میں امریکی صدر کے بیان اور ثالث بننے کی پیشکش کو مسترد کردیا لیکن اپوزیشن جماعتوں نے وزیراعظم نریندر مودی کی طرف سے وضاحتی بیان کا مطالبہ کردیا ہے۔

کانگرس کے رہنما منیش تواڑی نے کہا ہم وزارت خارجہ کی بجائے مودی سے وضاحت کا مطالبہ کرتے ہیں۔ اس دوران راجیہ سبھا میں خوب شور مچا اور "مودی جواب دو" کے نعرے لگتے رہے۔ ترجمان بھارتی وزارت خارجہ نے ایک بار پھر ہٹ دھرمی کا مظاہرہ کرتے ہوئے کہا کہ مودی نے تو ٹرمپ سے مسئلہ کشمیر پرثالث بننے کی کوئی درخواست ہی نہیں کی۔

President Trump says PM Modi asked him to mediate between India & Pakistan on Kashmir!

If true, PM Modi has betrayed India’s interests & 1972 Shimla Agreement.

A weak Foreign Ministry denial won’t do. PM must tell the nation what transpired in the meeting between him & @POTUS

— Rahul Gandhi (@RahulGandhi) July 23, 2019

دوسری جانب کانگریس کے سابق صدر راہول گاندھی نے اپنی ٹوئٹ میں کہا کہ اگر مودی نے ایسا کچھ کیا ہے تو ملک کو دھوکا دیا ہے اور ایک کمزور وزارت خارجہ کی تردید سے کام نہیں چلے گا بلکہ خود وزیراعظم مودی کو اس کا جواب دینا ہوگا۔