مظفرگڑھ مسافر وین میں گیس سلنڈر پھٹنے سے 3 افراد جاں بحق 8 زخمی

چوک قریشی کے قریب مسافر ویگن میں گیس سلنڈر پھٹنے کے باعث آگ بھڑک اٹھی جس کے نتیجے میں 2 بچوں سمیت 3 مسافرجھلس کر جاں بحق اور 8 زخمی ہوگئے۔


ایکسپریس نیوز کے مطابق ڈیرہ غازیخان سے جھنگ جانے والی مسافرویگن چوک قریشی کے قریب پہنچی تو اچانک وین میں موجود گیس سلنڈر پھٹ گیا اور آگ بھڑک اٹھی، آگ نے دیکھتے ہی دیکھتے پوری ویگن کو اپنی لپیٹ میں لے لیا، کئی مسافروں نے وین سے کود کر اپنی جان بچائی، اس دوران 8 مسافر جھلس کر شدید زخمی ہوگئے، جبکہ ویگن کے درمیان میں بیٹھی خاتون اور 2 کم سن بچے کوشش کے باوجود باہرنہ نکل سکے اور بری طرح جھلس کر موقع پرجاں بحق ہوگئے، تاحال تینوں کی شناخت نہ ہوسکی ہے۔

ریسکیو ٹیموں نے جائے حادثہ پر پہنچ پر زخمیوں اور لاشوں کو اسپتال منتقل کردیا جہاں انہیں طبی امداد فراہم کی جارہی ہے، اسپتال ذرائع کے مطابق زخمیوں میں سے کچھ افراد کی حالت تشویشناک ہے جس سے ہلاکتوں میں اضافے کا خدشہ ہے، حادثے میں ویگن مکمل طور پرجل کر تباہ ہوگئی۔