ترک فضائیہ نے فضائی حدود کی خلاف ورزی پر شامی فوج کا ہیلی کاپٹر مارگرایا

ترکی کے نائب وزیراعظم بلنٹ آرنک نے بتایا کہ شام کا ایم آئی 17 جنگی ہیلی کاپٹر ترکی کی فضائی حدود میں داخل ہوا اور 2 کلو میٹر اندر تک پرواز کرتا رہا. فوٹو: فائل

---

ترکی کے جنگی طیاروں نے فضائی حدود کی خلاف ورزی کرنے والے شامی ہیلی کاپٹر کو مار گرایا۔

ترکی کے نائب وزیراعظم بلنٹ آرنک نے میڈیا کو بتایا کہ شام کا ایم آئی 17 جنگی ہیلی کاپٹر ترکی کی فضائی حدود کی خلاف ورزی کرتے ہوئے 2 کلو میٹر اندر تک پرواز کرتا رہا، ترک فضائیہ کے حکام کی جانب سے ہیلی کاپٹر کو کئی بار وارننگ جاری کئے جانے کے باوجود ہیلی کاپٹر نے پرواز جاری رکھی جس پر فضائیہ نے اسے نشانہ بنا کر تباہ کردیا۔

واضح رہے کہ شام میں صدر بشار الاسد کی حمایتی فوج کی جانب سے عوام پر مبینہ کیمائی ہتھیاروں کے استعمال کے بعد ترکی نے امریکا کی جانب سے شام کے خلاف فوجی کارروائی کرنے کی حمایت کی تھی۔ شام میں بدترین خانہ جنگی کی وجہ سے 20 لاکھ سے زائد افراد نے ترکی میں پناہ لے رکھی ہے۔