تحریک عدم اعتماد ناکام ہونے پر وزیراعظم کی چیئرمین سینیٹ کو مبارکباد

آپ نے ثابت کیا ہے کہ ایوان کا آپ پر اعتماد ہے، وزیراعظم عمران خان. فوٹو:فائل

---

وزیراعظم عمران خان نے چیئرمین سینیٹ صادق سنجرانی کو ٹیلی فون پر رابطہ کرکے تحریک عدم اعتماد ناکام ہونے پر مبارکباد دی۔

چیئرمین سینیٹ صادق سنجرانی کے خلاف اپوزیشن کی جانب سے جمع کروائی گئی تحریک عدم اعتماد ناکام ہونے پر وزیراعظم عمران خان نے صادق سنجرانی سے ٹیلی فونک رابطہ کیا اور تحریک ناکام ہونے پر انہیں مبارکباد دیتے ہوئے کہا کہ یہ سب اللہ کا کرم ہے اور آپ نے ثابت کیا ہے کہ آپ پر ایوان کا اعتماد ہے۔

دوسری جانب گورنر سندھ عمران اسماعیل نے بھی چیئرمین سینیٹ صادق سنجرانی سے ملاقات کی اور انہیں تحریک عدم اعتماد ناکام ہونے پر مبارک باد پیش کی۔

اس خبرکوبھی پڑھیں: چیئرمین اور ڈپٹی چیئرمین سینیٹ کیخلاف تحاریک عدم اعتماد ناکام

واضح رہے کہ اپوزیشن جماعتوں کی جانب سے چیئرمین سینیٹ کے خلاف تحریک عدم اعتماد کی تحریک قائد حزب اختلاف راجہ ظفرالحق نے پیش کی تھی جس کی کامیابی کے لیے 53 ووٹ درکار تھے تاہم اپوزیشن 50 ووٹ حاصل کرنے میں کامیاب رہی۔ اسی طرح ڈپٹی چیئرمین سلیم مانڈوی والا کے خلاف بھی تحریک عدم اعتماد ناکام ہوگئی جس میں حکومت صرف 32 ووٹ حاصل کرنے میں کامیاب رہی۔ جس کے بعد چیئرمین اور ڈپٹی چیئرمین سینیٹ دونوں اپنے عہدے پر برقرار رہے۔