چوہدری شوگر مل کیس مریم نواز سے شیئرز کی منتقلی پر وضاحت طلب

مریم نواز سے شیئرز کی رسیدیں، رقم کی ادائیگی اور ایگریمنٹ کی تفصیلات طلب فوٹو: فائل

---

نیب نے چوہدری شوگر مل کے غیر ملکی حصہ دار کی جانب سے مریم نواز کو شیئرز کی منتقلی پر وضاحت طلب کرلی ہے۔

نیب ذرائع کے مطابق چوہدری شوگر مل کیس کی تحقیقات میں سامنے آیا ہے کہ سعید سیف بن جابر الساویدی کی جانب سے 94 لاکھ 8 ہزار 90 ، شیخ ذکاؤالدین کی جانب سے 20 لاکھ 21ہزار 760 شئیرز جب کہ ہانی احمد جام کی جانب سے 97 ہزار 33 شیئرز مریم نواز کو منتقل ہوئے۔ ان تمام شیئرز کی منتقلی 21 مئی 2008 کو کئے جانے کا انکشاف ہوا ہے۔

نیب کی تحقیقات کے مطابق گارڈن ٹاؤن کے نجی بینک میں کروڑوں روپے منتقل کئے گئے۔ یکم فروری کو 78 لاکھ 87 ہزار 914 روپے، 11جون 2008 کو اسی بینک اکاؤنٹ میں ایک کروڑ 91 لاکھ جب کہ 20 جون 2008 کو ایک کروڑ 49 لاکھ 12 ہزار 280 روپے بیرون ملک سے منتقل ہوئے۔ اسی طرح جاتی عمرہ کے قریب شریف ایجوکیش کمپلیکس میں واقع ایک نجی بینک میں بھی بیرون ملک اے مریم نواز کے نام رقم کی منتقلی کا نیب نے سراغ لگایا ہے۔اس بنک اکاونٹ میں 28 دسمبر 2016 کو 99 لاکھ 71 ہزار 17 روپے کی رقم منتقل ہوئی۔نیب نے اپنی تحقیقات میں مریم نواز کے نام بیرون ممالک سے منتقل ہونے والی منتقل ہونے والی 5 کروڑ 18 لاکھ 96 ہزار 135 روپے کی خطیر رقم کی تفصیلات کا کھوج لگا لیا ہے۔

نیب نے مریم نواز کو بیرون ممالک سے منتقل ہونے والی رقوم کے ساتھ ساتھ پاکستان میں سیکڑوں کینال زمینوں کی تفصیلات بھی حاصل کر لی گئی ہیں۔4 مختلف موضع جات میں ایک ہزار 496 کنال اور 12 مرلے زمین کی خریداری بھی کی گئی۔ موضع سلطانکے میں 1087 کنال 6 مرلے زمین خریدنے کا انکشاف ہوا ہے، اسی طرح موضع مل میں 333 کنال 3 مرلے، موضع بدوکی سانی میں 62 کنال 2 مرلے اور موضع اصل لکھوال میں 14 کنال ایک مرلہ زمین خریدی گئی۔ نیب حکام کی جانب سے ان تمام جائیدادوں کی اصل مالیت ذرائع خریداری سمیت زمین کی سابقہ مالکان کی تفصیل بھی مانگ لی۔

نیب نے اس سوال کی وضاحت بھی مانگی ہے کہ مریم نواز نے 70 لاکھ شیئرز یوسف عباس کو منتقل کئے۔ یہ شیئرز 20 جولائی 2011 کو یوسف عباس نے نصیر عبداللہ کو ٹرانسفر کیے اور بعد ازاں یہ شیئرز حسین نواز کو منتقل کر دئیے گئے۔ نیب نے مریم نواز سے ان شئیرز کی رسیدیں، رقم کی ادائیگی اور ایگریمنٹ کی تفصیلات بھی ساتھ لانے کا کہا ہے۔