’’کشمیر بنے گا پاکستان‘‘ کی گونج سری نگر تک پہنچ گئی

پارلیمنٹ کے مشترکہ اجلاس میں زوردار نعرے " کشمیر بنے گا پاکستان" کی گونج سری نگر کے ہر گھر تک پہنچ گئی۔


نریندر مودی کے کشمیر پرموذی وار سے درپیش سخت امتحان میں سرخرو ہونے کے لیے پاکستان کو طویل اور مشکل جدوجہد کا سامنا ہے۔ کٹھن سفر کا آغاز خوش آئند ہوا ہے۔ بحران میں مضبوط ثابت ہونے والی قوموں کی طرح پاکستان کی قومی سلامتی کمیٹی نے ہم آہنگ، مربوط، حقیقت پسندانہ اور قابل عمل فیصلے کیے ہیں جس سے پاکستانی اور کشمیری عوام کو اطمینان اور اعتماد ملا ہے کہ کشمیر ہڑپ کرنے کا بھارتی منصوبہ ناکام ہو گا۔

پارلیمنٹ کے مشترکہ اجلاس کی قرارداد ہو یا قومی سلامتی کمیٹی کے اجلاس کے بعد اعلامیہ، بھارت اور دنیا کو پیغام گیا کہ سیاسی طور پر منقسم پاکستان کی قیادت کی کشمیر پردو رائے نہیں۔ مشترکہ اجلاس میں زوردار نعرے " کشمیر بنے گا پاکستان" کی گونج سری نگر کے کرفیو زدہ محلوں اور گلیوں کے ہر گھر تک پہنچ گئی ہو گی۔ کشمیری عوام کا یقین بڑھ گیا ہو گا کہ ان کی خاطر پاکستانی عوام بھارت کے ساتھ مرنے مارنے پر نہ صرف تیار ہیں بلکہ قدم بھی بڑھا دیا ہے۔