کالعدم تحریک طالبان نے لورالائی سے اغوا کئے جانے والے 3 ڈاکٹروں کو رہا کردیا

کالعدم تحریک طالبان نے تینوں ڈاکٹرز کو رواں سال 11 جون کو لورالائی سے اغوا کرلیا تھا، فوٹو: فائل

---

کالعدم تحریک طالبان نے بلوچستان کے ضلع لورالائی سے اغوا کئے جانے والے 3 ڈاکٹروں کو رہا کردیا ہے۔

ایکسپریس نیوز کے مطابق کالعدم تحریک طالبان نے کوئٹہ سے اغوا کئے گئے ڈاکٹر نصراللہ، ڈاکٹر انورشبوزئی، ڈاکٹر ایاز احمد کو بغیر کسی شرط کے بنوں انتظامیہ کے حوالے کردیا۔ تحصیل دار اخلاق احمد کا کہنا ہے کہ تینوں ڈاکٹرز کی صحت بالکل ٹھیک ہے اور طالبان نے قید کے دوران انہیں کسی قسم کا کوئی نقصان نہیں پہنچایا۔

واضح رہے کہ تینوں ڈاکٹروں کو رواں سال 11 جون کو لورالائی سے نامعلوم افراد نے اغوا کرلیا تھا تاہم بعد میں اغوا کی ذمہ داری کالعدم تحریک طالبان نے قبول کی تھی، تینوں ڈاکٹروں کے اغوا کے خلاف کوئٹہ کے ڈاکٹرز نے گزشتہ 3 ماہ سے احتجاجی کیمپ بھی لگایا ہوا تھا۔