شہری کچرا پھینکنے والوں کی ویڈیو بنا کر سوشل میڈیا پر ڈال دیں علی زیدی

کہیں کچرا دیکھیں تو ہمیں لوکیشن بھیجیں ہم متعلقہ ضلع کو اطلاع کرکے کچرا ہٹائیں گے، علی زیدی فوٹو:فائل

---

وفاقی وزیر برائے بحری امور سید علی زیدی نے شہریوں کو مشورہ دیا ہے کہ جس شخص کو بھی کچرا پھینکتے ہوئے دیکھیں اس کی تصویر کھینچ کر جگہ اور نام سوشل میڈیا پر ڈال دیں۔

کراچی میں صفائی مہم کے حوالے سے میڈیا سے بات کرتے ہوئے سید علی زیدی نے کہا کہ کیا نالے صاف کرنا وزیر بحری امور کا کام ہے؟ یہ کام بلدیاتی حکومت کا ہوتا ہےاور کچرا کنڈی صاف کرنا سندھ سالڈ ویسٹ مینجمنٹ کا کام ہے۔

علی زیدی نے کہا کہ مجھے وزیر اعظم کی براہ راست ہدایت تھی کہ کراچی کے مسئلے کو دیکھو، ہم صفائی کی کوشش کر رہے ہیں اور اگرجیت گئے تو جلد چمکتا دمکتا کراچی دکھائی دے گا، اس صفائی مہم پر بہت سے لوگوں نے تنقید بھی کی لیکن جب کام کرتے ہیں تو تنقید کا بھی سامنا ہوتا ہے اور لوگ سراہتے بھی ہیں، ہم اپنا کام جاری رکھیں گے۔

یہ بھی پڑھیں: علی زیدی کا 14 اگست تک کراچی کی صفائی مکمل کرنے کا دعویٰ

وفاقی وزیر نے شہر کو صاف رکھنے کے لیے نیا طریقہ پیش کرتے ہوئے کہا کہ جسے بھی کچرا پھینکتے ہوئے دیکھیں اس کی تصویر کھینچ کر لوکیشن اور نام سوشل میڈیا پر ڈال دیں تاکہ سب کو معلوم ہونا چاہیے کہ کون سا شخص کچرا پھیلا رہا ہے جب کہ کہیں کچرا دیکھیں تو ہمیں لوکیشن بھیجیں ہم متعلقہ ضلع کو انفارم کریں گے اور کچرا ہٹائیں گے۔