پولیس کو کروڑوں روپے کے ’پنیرچور‘ کی تلاش

کینیڈا میں ایک شخص جعلی کاغذات پر کمپنی سے ایک لاکھ ستاسی ہزار ڈالر مالیت کا پنیر چرا کر لے گیا۔ (فوٹو: فائل)

---

کینیڈا میں میں پولیس کو ایک ایسے شخص کی تلاش ہے جو کروڑوں روپے کا قیمتی پنیر لے اڑا ہے اور اس نے ٹرک بھر کر پنیر کسی نامعلوم جگہ پہنچا دیا ہے۔

تفصیلات کے مطابق اونٹاریو میں پنیر بنانےوالی کمپنی کے دفتر میں ایک شخص صبح سویرے پہنچا اور اس نے مکمل کاغذات دکھائے جن سے ثابت ہورہا تھا کہ اعلیٰ درجے کے پنیر کی اتنی مقدار نیوبرنس وِک میں ایک جگہ لےجانی ہے۔

وہ شخص اپنے ساتھ ایک ٹرک لے کر آیا تھا جس میں پنیر رکھا گیا اور مطلوبہ مقدار پوری ہونے پر وہ شخص پنیر لے کر روانہ ہوگیا۔ تاہم مقررہ وقت گزرجانےکے باوجود بھی پنیر اس مقام پر نہیں پہنچا جو کاغذات پر درج تھا۔

بعد ازاں تفتیش سے معلوم ہوا کہ پنیر لے جانے کے تمام کاغذات جعلی تھے اور پنیر اپنے مقام پر نہیں پہنچا ہے۔ کمپنی نے پنیر کی تفصیل نہیں بتائی لیکن اتنا ضرور کہا ہے کہ اس کی مالیت ایک لاکھ ستاسی ہزار ڈالر تھی۔