پاکستان اور فنانشل ایکشن ٹاسک فورس کے درمیان حتمی مذاکرات آسٹریلیا میں شروع

پاکستان نے 22 نکاتی رپورٹ پیش کردی اور پاکستان کا نام گرے لسٹ سے نکلنے کے امکانات ہیں، ذرائع

Irshad Ansari August 19, 2019

ایشیاء پیسفک کا ٹیررازم فناسنگ میں ملوث افرادکو سزا پر زور، ذرائع فوٹو: فائل

ISLAMABAD: پاکستان اور فنانشل ایکشن ٹاسک فورس کے درمیان FATF ایکشن پلان پر عملدرآمد کے حوالے سے حتمی مذاکرات آسٹریلیا میں شروع ہوگئے۔

پاکستان کی جانب سے بتایا گیا اقوام متحدہ کے ادارہ برائے ڈرگ اینڈ کرائم کے تعاون سے نئی نیشنل رسک اسیسمنٹ شروع کردی گئی ہے اور منی لانڈرنگ و ٹیررازم فنانسنگ کے حوالے سے کی جانیوالی کارروائیوں سے متعلق آگاہ کیا گیا، FATF کے وفد میں شامل ایشیاء پیسفک گروپ(اپی جی)کی جانب سے ٹیررازم فناسنگ میں ملوث عناصر کو سزائیں دینے پر زور دیا جارہا ہے ، پاکستان نے 26میں سے22 نکات پر عملدرآمد کے بارے میں رپورٹ پیش کی، مذاکرات میں پاکستانی وفد کی قیادت گورنر اسٹیٹ بینک رضاباقر کررہے ہیں، وزارت خزانہ کے مطابق پاکستان نے زیادہ پیش رفت کی ہے اس لیے توقع ہے نومبر میں اچھی خبر آئیگی اور پاکستان کا نام بلیک لسٹ میں تو شامل نہیں ہوگا اور گرے لسٹ سے نام نکالے جانے کے بھی امکانات ہیں ۔

FATF کو ٹیررازم فناسنگ اور ٹیررازم میں مبینہ طور پر ملوث تنظیموں ،افراد کیخلاف کارروائی ، حافظ سعید ، متعددمدارس کے حوالے سے بتایاگیا، بیئرر سرٹیفکیٹس اور بیئرر انعامی بانڈز ختم کرنیکی شرط پر عمل کیا گیا،40 ہزارمالیت کے انعامی بانڈز کی رجسٹریشن پرفیٹف نے اطمینان کا اظہار کیاہے ، ادھرنیکٹا کی جانب سے فراہم فہرست اور تفصیلات کی تصدیق آخری مراحل میں ہے، ٹیررازم فنانسنگ ، منی لانڈرنگ کے حوالے سے 37 افرادکیخلاف کارروائی جاری ، وکلاء،چارٹرڈ اکاؤنٹنٹس ودیگرکی مانیٹرنگ و نگرانی کا میکنزم متعارف کروانے کا فیصلہ کیا ہے۔