وزیراعظم آفس نے وزارت خزانہ اورایف بی آر سے نیشنل ڈیٹا بیس رجسٹریشن اتھارٹی کے ڈیٹا اینالسزکی بنیاد پرٹیکس ادا نہ کرنے والے اورکم ٹیکس دینے والے شہریوں کیلیے ٹیکس ایمنسٹی اسکیم کے قابل عمل پلان کے بارے میں رپورٹ طلب کرلی ہے۔

ایکسپریس کو دستیاب وزارت خزانہ کے اخراجات ونگ ایف بی آرکے ڈپٹی سیکریٹری افتخار جنجوعہ کے دستخطوں سے چیئرمین ایف بی آرکو لکھے گئے لیٹر میں کہاگیا ہے کہ وزیراعظم آفس کے پی ایم ڈی یو ونگ کی جانب سے 29 جولائی کو لیٹر موصول ہوا ہے جس میں پی ایم ڈی یوکی جانب سے ریفرنس نمبر T3704C کے تحت دیے جانے والے ٹاسک کے متعلق رپورٹ مانگی گئی ہے۔