مقبوضہ کشمیر میں مظالم پر بھارتی بیوروکریٹ نے احتجاجاً استعفیٰ دیدیا

بھارت مقبوضہ کشمیر میں جو کر رہا ہے اس کامقصد انسانی جانوں کاتحفظ نہیں، کنن گوپی ناتھ فوٹوانڈین میڈیا

---

مقبوضہ کشمیر میں بھارتی حکومت کے مظالم پر نوجوان بیورو کریٹ کنن گوپی ناتھ نے احتجاجاً استعفی دے دیا۔

بھارتی میڈیا کے مطابق بیورو کریٹ کنن گوپی ناتھ نے بھارتی حکومت کے کشمیر میں ڈھائے جانے والے مظالم کو بے نقاب کرتے ہوئے کہا ہے کہ بھارت مقبوضہ کشمیر میں جو کر رہا ہے اس کامقصد انسانی جانوں کاتحفظ نہیں۔

سابق بھارتی بیورو کریٹ نے کہا کہ کشمیریوں سے حق رائے آزادی چھینا جا رہا ہے، جمہوریت میں ہم کسی بھی شہری کے حقوق غصب نہیں کرسکتے۔ انہوں نے اپنے استعفیٰ سے متعلق بتاتے ہوئے کہا تھا کہ جموں کشمیر میں بنیادی حقوق کی دھجیاں اڑتے دیکھ کر انہوں نے اپنے استعفے کے کاغذات جمع کرائے۔

کنن کا کہنا ہے کہ وہ سول سروس میں اس امید پر شامل ہوئے تھے کہ وہ ان لوگوں کی آواز بنیں گے جو خاموش ہیں لیکن یہاں وہ اپنی آواز بھی کھو بیٹھے، جب دنیا کی ایک بڑی جمہوریت پوری ریاست پر پابندیوں کا اعلان کرتی ہے اور لوگوں کے بنیادی حقوق کی خلاف ورزی کرتی ہےتو کم از کم وہ یہ جواب دے سکتے ہیں کہ انہوں نے ملازمت ہی چھوڑ دی۔

کنن گوپی ناتھ نے ٹوئٹ کرتے ہوئے کہا تھا میں نے ایک بار سوچاتھا کہ سول خدمات میں شامل ہونے کا مطلب شہریوں کے حقوق اور آزادی کو بڑھانے کا ایک موقع ہے۔

I once thought that being in civil services meant an opportunity to expand the rights and freedoms of fellow citizens!

— Kannan Gopinathan (@naukarshah) August 20, 2019

کنن گوپی ناتھ دوسرے آئی اے ایس آفیسر ہیں جنہوں نے کشمیر میں ہونے والی خلاف ورزیوں کے باعث استعفیٰ دیا ان سے قبل آئی اے ایس آفیسر شاہ فیصل بھی استعفٰی دے چکے ہیں۔

Kannan Gopinathan, IAS officer resigns from service:I joined the services believing I can give voice to others, but here I am unable to use my own voice. My resignation will give me my freedom of expression back. We have taken a decision & then we have detained everybody.#Kashmir pic.twitter.com/gNSLnuyRyG

— Parthiban Shanmugam (@hollywoodcurry) August 24, 2019