ای او بی آئی اسکینڈل ملزمان پر 2اکتوبر کو فرد جرم عائد کی جائے گی

انسداد بدعنوانی کی خصوصی عدالت نے ای او بی آئی بدعنوانی کیس میں ملوث سابق ڈائریکٹر جنرل ای او بی آئی کنور خورشید ، کرنل (ر) اسد علی، ان کی اہلیہ نگہت ، بیٹی ماہم اور سابق نگراں وزیر سندھ اقبال دائود پاک والا پر فرد جرم عائد کرنے کیلیے2 اکتوبر کی تاریخ مقرر کردی ہے۔


منگل کو جیل حکام نے مزکورہ ملزمان کو فاضل عدالت میں پیش کیا تھا اس موقع پر استغاثہ کی جانب سے وکیل سرکار نے مقدمے کی اور گواہوں کے بیانات کی نقول فراہم کردی۔ فاضل عدالت نے ملزمان کو وکلاء کی حاضری کو یقینی بنانے کی ہدایت کی ہے اور سماعت 2اکتوبر تک ملتوی کردی قبل ازیں ملزمان کے وکیل خواجہ نوید پیشی کے موقع پر تاخیر سے پہنچے تھے اور تحریری درخواست میں استدعا کی تھی کہ انھیں عدالت عالیہ میں مصروفیات کے باعث تاخیر ہوئی ، استغاثہ کے مطابق ای او بی آئی اسکینڈل میں ملزمان پر اراضی کی خریداری کی مد میں کروڑوں روپے کی بدعنوانی کرنے کا الزام ہے۔