شاہد آفتاب نے رینکنگ اسنوکر چیمپئن شپ اپنے نام کرلی عبدالستار کو شکست

فتح پانے والے شاہد آفتاب نے ٹرافی کے ساتھ 70 ہزار روپے کا انعام بھی وصول کیا۔فوٹو: فائل

---

لاہور: سابق قومی چیمپئن شاہد آفتاب نے دلچسپ مقابلے کے بعد عبدالستار کو7-4سے شکست دے کر تیسری قومی رینکنگ اسنوکر چیمپئن شپ اپنے نام کرلی، پاکستان بلیئرڈ اینڈ اسنوکر ایسوسی ایشن کے تحت منعقدہ ایونٹ کی تقریب تقسیم انعامات کے مہمان خصوصی ممتاز آل رائونڈر شاہد خان آفریدی تھے۔

تفصیلات کے مطابق پنجاب کے شاہد آفتاب نے اپنے تجربہ کی بدولت سندھ کے سابق صوبائی چیمپئن عبدالستار کے خلاف اپنی برتری ثابت کی، انھوں نے15 فریمز پر مشتمل فائنل کے ابتدائی دونوں فریمز میں ناکامی کے بعد کھیل میں واپس آتے ہوئے چھٹے فریم میں مقابلہ 3-3 سے برابر کیا، سیمی فائنل میں ٹاپ سیڈ عمران شہزاد کو مات دینے والے شاہد نے اگلے فریم کی قربانی دینے کے بعد8 واں فریم جیت کر مقابلہ4-4 سے برابر کر دیا، انھوں نے پھر مڑ کر نہ دیکھا اور لگاتار اگلے تینوں فریمز بھی جیت کر ٹرافی اپنے نام کرلی،فائنل میں 7-4 سے فتح پانے والے شاہد آفتاب نے ٹرافی کے ساتھ 70 ہزار روپے کا انعام بھی وصول کیا جبکہ عبدالستار نے رنراپ ٹرافی اور 40 ہزار روپے پائے۔