بھارت میں 5 منزلہ عمارت گرنے سے 6 افراد ہلاک 19 زخمی

بھارتی شہر ممبئی میں 5 منزلہ عمارت گرنے سے 6 افراد ہلاک جب کہ 19 زخمی ہوگئے ہیں۔


بھارتی میڈیا کے مطابق ممبئی کے جنوب میں ڈاکیارڈ روڈ پر واقع شہری ملازمین کے اسٹاف کی 5 منزلہ رہائشی عمارت نامعلوم وجوہات کی بنا پر گر گئی جس کے نتیجے میں 6 افراد ہلاک اور 19 زخمی ہوگئے، مرنے والوں میں تین افراد کا تعلق ایک ہی خاندان سے ہے۔ ابتدائی اطلاعات کے مطابق 50 سے زائد افراد ملبے تلے دبے ہوئے ہیں جنہیں نکالنے اور ملبہ ہٹانے کے لئے ریسکیو ٹیموں نے بھاری مشینری سے آپریشن شروع کردیا ہے تاہم ہلاکتوں میں اضافے کا خدشہ ظاہر کیا جارہا ہے۔

واضح رہے كہ گزشتہ ماہ بھارتی ریاست گجرات کے شہر وڈوڈارا میں 4 منزلہ عمارت گرنے سے 5 افراد ہلاک اور متعدد زخمی ہوگئے تھے جبکہ بھارتی ریاست آندھرا پردیش میں بھی ہوٹل کی عمارت گرنے سے 13 افراد ہلاک جبكہ 17 زخمی ہوگئے تھے۔