عابد علی کی بیٹی نے والد کی موت کی افواہوں کی تردید کردی

جب تک والد زندہ ہیں انہیں زندہ رہنے دیا جائے، راحمہ عابد کی لوگوں سے درخواست

ویب ڈیسک September 04, 2019

والد کی موت کی خبر میں کوئی صداقت نہیں، بیٹی راحمہ عابد فوٹوفائل

نامور پاکستانی اداکار عابد علی کی بیٹی راحمہ علی نے اپنے والد کی موت کی تردید کرتے ہوئے کہا ہے کہ میرے والد زندہ ہیں ان کی موت سے متعلق جھوٹی افواہیں پھیلائی جارہی ہیں جب تک وہ زندہ ہیں انہیں زندہ رہنے دیاجائے۔

پاکستان ٹی وی انڈسٹری کے لیجنڈ اداکار عابد علی ان دنوں شدید علیل ہیں اور اسپتال میں زیرعلاج ہیں۔ ان کی بیٹیوں ایمان علی اورراحمہ علی نے سوشل میڈیا پر لوگوں سے درخواست کرتے ہوئے کہا تھا کہ ان کے والد کی حالت تشویشناک ہے لہٰذا ان کی جلد صحت یابی کی دعا کریں۔

تاہم سوشل میڈیا پرعابد علی کی موت کی جھوٹی افواہیں گردش کرنے لگیں جس پر عابد علی کی چھوٹی بیٹی راحمہ نے والد کی موت کی جھوٹی افواہیں پھیلانے والوں کو شدید تنقید کا نشانہ بناتے ہوئے کہا ہے کہ میرے والد زندہ ہیں ان کی موت سے متعلق جھوٹی افواہیں پھیلائی جارہی ہیں، ان کی موت کی خبر میں کوئی صداقت نہیں، جب تک وہ زندہ ہیں ان کو زندہ رہنے دیا جائے۔

اس خبرکوبھی پڑھیں: اداکار عابد علی کی حالت تشویشناک، دعا کی درخواست

راحمہ نے مزید کہا میں نے پہلے بھی قوم سے دعاؤں کی اپیل کی تھی، اب بھی قوم سے ان کی زندگی اور صحت کے لئے دعاؤں کی اپیل کرتی ہوں، کچھ دیر قبل ہی اسپتال انتظامیہ نے والد کا چیک اپ کیا وہ خیریت سے ہیں۔

واضح رہے کہ عابد علی کا شمار پاکستان کے لیجنڈ اداکاروں میں ہوتا ہے انہوں نے ''وارث''، ''دیار دل''، ''مہندی''، ''بیٹیاں''، ''صنم''، ''رخصتی'' اور''دشت'' جیسے مقبول ڈراموں میں لازوال کردار ادا کیے ہیں۔