پاکستان نے بھارتی صدرکوفضائی حدود استعمال کرنے سے روک دیا

بھارتی جنونیت کو مد نظر رکھتے ہوئے بھارتی صدر کو پاکستانی فضائی حدود کے استعمال کی اجازت نہیں دی، وزیر خارجہ

ویب ڈیسک September 07, 2019

بھارتی صدررام ناتھ کووند نے رواں ماہ 8 تاریخ کو آئس لینڈ جانا تھا: فوٹو: فائل

پاکستان نے بھارت کے صدررام ناتھ کووند کو اپنی فضائی حدود استعمال کرنے کی اجازت دینے سے انکار کردیا۔

ایکسپریس نیوز کے مطابق بھارتی صدر رام ناتھ کووند کو 8 ستمبر کو آئس لینڈ جانا تھا۔ بھارت نے صدرکے لیے پاکستان سے فضائی حدود استعمال کرنے کی اجازت مانگی تھی تاہم پاکستان نے اپنی فضائی حدود استعمال کرنے کی اجازت دینے سے انکار کردیا اور بھارتی صدر کے طیارے کے لئے کلیرنس نہیں دی۔

اس خبرکو بھی پڑھیں: مودی کا طیارہ پاکستانی فضائی حدود سے گزر کر فرانس پہنچا

اس حوالے سے وزیر خارجہ شاہ محمود قریشی نے کہا کہ بھارتی صدر کو پاکستانی فضائی حدود کے استعمال کی اجازت نہیں دی جارہی، بھارتی جنونیت کو مد نظر رکھتے ہوئے پاکستان نے یہ فیصلہ کیا، بھارت نے گزشتہ 34 روز سے کشمیریوں کو بنیادی سہولتوں سے محروم کررکھا ہے، ہم نے صبر و تحمل کا مظاہرہ کیا اور نہایت محتاط طریقے سے مسئلے کو اٹھایا لیکن بھارتی حکومت ٹس سے مس نہیں ہو رہی،

واضح رہے کہ گزشتہ ماہ بھارتی وزیراعظم نریندر مودی کا طیارہ پاکستانی فضائی حدود استعمال کرتے ہوئے فرانس پہنچا تھا جس کی اجازت پاکستان کی جانب سے باقائدہ دی گئی تھی۔