امریکی صدر نے مشیر قومی سلامتی امور کو عہدے سے ہٹا دیا

جان بولٹن کے ساتھ متعدد معاملات پر اختلاف تھا،صدر ٹرمپ، فوٹو: فائل

---

امریکی صدر ڈونلڈ ٹرمپ نے قومی سلامتی کے مشیر جان بولٹن کو عہدے سے فارغ کر دیا۔

امریکی صدر ڈونلڈ ٹرمپ نے ٹوئٹر پر جان بولٹن کو مشیر قومی سلامتی امور کے عہدے سے برطرف کرنے کا اعلان کرتے ہوئے لکھا کہ گزشتہ رات جان بولٹن کو آگاہ کیا تھا کہ انہیں عہدےسے ہٹایا جارہا ہے۔

امریکی صدر نے لکھا کہ متعدد معاملات میں مجھے جان بولٹن کی تجاویز سے شدید اختلاف تھا، انہیں بتا دیا گیا ہے کہ وائٹ ہاؤس میں ان کی مزید ضرورت نہیں ہے۔ امریکی صدر نے لکھا کہ قومی سلامتی کے نئے مشیر کا اعلان آئندہ ہفتے کروں گا۔

I informed John Bolton last night that his services are no longer needed at the White House. I disagreed strongly with many of his suggestions, as did others in the Administration, and therefore....

— Donald J. Trump (@realDonaldTrump) September 10, 2019

واضح رہے کہ 23 مارچ 2018 کو امریکی صدر نے جان بولٹن کو مشیر قومی سلامتی امور کی ذمہ داریاں سونپی تھیں۔جان بولٹن اس سے قبل اقوام متحدہ میں امریکی سفیر متعین تھے۔ اقوام متحدہ میں بطور سفیر جان بولٹن روس کے خلاف سخت موقف رکھنے، ایران اور شمالی کوریا کے خلاف فوجی کارروائی کرنے کے حامی اور اپنے جارحانہ اور سخت گیر لہجے کے حامل قدامت پسند شخص کے طور پر شہرت رکھتے تھے۔