حکومت اور طالبان اللہ اور رسولﷺ کے نام پر جنگ بندی کریں علمائے کرام کی اپیل

مذاکرات کی کامیابی تک مسلح کارروائیوں سے گریز کیا جائے، علمائے کرام کی اپیل فوٹو؛ محمد اقبال

---

ملک بھر کے نامور علمائے کرام اور مشائخ نے حکومت اور طالبان سے اللہ اور رسول ﷺ کے نام پر اپیل کی ہے کہ وہ فوری طور پر جنگ بندی کریں اور مذاکرات کی کامیابی تک مسلح کارروائیوں سے گریز کریں۔

اسلام آباد میں صدر وفاق المدارس شیخ الحدیث مولانا سلیم اللہ خان کے زیر صدارت اجلاس ہوا جس میں حکومت ، فوج اورکالعدم تحریک طالبان کی طرف سے باہمی مذاکرات کے ذریعے خانہ جنگی ختم کرکے ملک میں امن قائم کرنے کے عزم پر اطمینان کا اظہار کیاگیا۔ ان کاکہنا تھا کچھ عناصر قیام امن کے راستے بند کرنے کے درپے ہیں جب کہ خانہ جنگی اور بیرونی سازشوں سےملک کو نکالنے کے لئے پوری قوم کو ایک پلیٹ فارم پر جمع کرنے کابہتر طریقہ مذاکرات ہیں۔

علمائے کرام کا کہنا تھا کہ طاقت کا بے جا استعمال اور خونریزی کسی مسئلے کا حل نہیں ،اجلاس میں مفتی رفیع عثمانی، مولانا تقی عثمانی، مولانا ڈاکٹر عبدالرزاق سکندر، مولانا حنیف جالندھری،مولانا فضل محمد اور دیگر شریک ہوئے۔