زلزلے سے متعلق فردوس عاشق اعوان کے بیان پر سوشل میڈیا پر تنقید

پاکستان میں آج آنے والے زلزلے کو انہوں نے حکومتی تبدیلی کے ساتھ ساتھ زمین کے اندر تبدیلی قرار دیا تھا

ویب ڈیسک September 25, 2019

پاکستان میں آج آنے والے زلزلے کو انہوں نے حکومتی تبدیلی کے ساتھ ساتھ زمین کے اندر تبدیلی قرار دیا تھا (فوٹو: پی آئی ڈی)

وزیرِ اعظم پاکستان کی معاون خصوصی برائے اطلاعات فردوس عاشق اعوان کی جانب سے زلزلے سے متعلق عجیب و غریب بیان پر سوشل میڈیا کے حلقوں میں شدید تنقید ہورہی ہے۔

ڈاکٹر فردوس عاشق اعوان نے نیشنل انسٹی ٹیوٹ آف انفارمیشن ٹیکنالوجی میں منعقدہ ایک تقریب میں جان لیوا زلزلے کی تباہ کاریوں اور عوامی تکلیف یکسر نظر انداز کرتے ہوئے کہا تھا جب کوئی تبدیلی آتی ہے تو نیچے بے تابی ہوتی ہے تو یہ تبدیلی کی نشانی ہے کہ زمین نے بھی کروٹ لی ہے کہ اسے بھی اتنی جلدی تبدیلی قبول نہیں۔

واضح رہے کہ وہ اس سیاسی تبدیلی کی بات کررہی تھیں جو وزیرِاعظم عمران خان کا سیاسی عزم و نعرہ رہا ہے۔ یہ جملے کہتے ہوئے فردوس عاشق اعوان بالکل خوشگوار موڈ میں تھیں حالانکہ وہ آزاد کشمیر کے تباہ کن زلزلے کا ذکر کررہی تھیں۔ 5.6 شدت کے اس زلزلے کا مرکز آزاد کشمیر تھا جس کے اثرات پنجاب اور خیبرپختونخواہ میں بھی دیکھے گئے تھے۔

فردوس عاشق اعوان کے اس بیان کے بعد سوشل میڈیا پر ان پر کڑی تنقید کرتے ہوئے انہیں غیرسنجیدہ اور مضحکہ خیز قرار دیا ہے۔ ٹی وی اینکر ماریہ میمن نے بھی اسے مضحکہ خیز قرار دیا ہے۔

دوسری جانب پاکستان پیپلز پارٹی کی رہنما شیری رحمان نے بھی اپنے ایک ٹویٹ میں اس بیان پر تنقید کی ہے۔

Monument to poor taste https://t.co/fxjlt8np8N
— SenatorSherryRehman (@sherryrehman) September 24, 2019

صحافی علی سلمان علوی نے مشیرِ وزیرِ اعظم کے بیان کو شرم ناک قرار دیتے ہوئے انہیں بے قابو توپ قرار دیا ہے۔

Firdous Ashiq Awan casually jokes about the #earthquake, without realizing that it could bring a devastating tragedy. This is beyond deplorable. The special adviser continues to act as a loose cannon. Shameful and insensitive. pic.twitter.com/iviEigecn8
— Ali Salman Alvi (@alisalmanalvi) September 24, 2019

میڈیا سے تعلق رکھنے والی ایک اور شخصیت مرتضیٰ سولنگی نے اسے غیر حساس اور غیرذمے دارانہ بیان قرار دیا ہے۔

Do I need to say anything about how insensitive and irresponsible this regime is?
Is this the best ⁦@ImranKhanPTI⁩ regime can do on a tragedy like earthquake causing deaths by dozens, injuring in hundreds and destroying precious properties? pic.twitter.com/k1BVgdBYXQ
— Murtaza Solangi (@murtazasolangi) September 24, 2019

فردوس عاشق اعوان نے اپنے بیان کی وضاحت میں ایک ویڈیو بیان دیا ہے کہ میری بات کو سیاق وسباق سے ہٹ کرپیش کیا گیا۔

میری گفتگوکوسیاق وسباق سے ہٹ کر پیش کرناافسوسناک ہے۔سوشل میڈیا کےمعاشرے پراثرات کےتناظر میں بات ہو رہی تھی۔اچانک زلزلہ آیا،شرکائے محفل پریشان ہوگئے۔حاضرین محفل کاحوصلہ بڑھانے کےلیے سوشل میڈیاکے تناظرمیں ہی جملےکہے جسے غلط رنگ دے کر عوام کوگمراہ کرنے کی افسوسناک کوشش کی جا رہی ہے pic.twitter.com/IJ8d0wwT0i
— Dr. Firdous Ashiq Awan (@Dr_FirdousAwan) September 24, 2019

انہوں نے کہا کہ میری گفتگو کو سیاق وسباق سے ہٹ کر پیش کرنا افسوس ناک ہے، سوشل میڈیا کےمعاشرے پر اثرات کے تناظر میں بات ہو رہی تھی اچانک زلزلہ آیا جس سے شرکا پریشان ہوئے اور میں نے حاضرین کا حوصلہ بڑھانے کے لیے سوشل میڈیا تناظر میں ہی بات کی تھی۔