انگلش فاسٹ بولر ثاقب محمود کو سوشل میڈیا پر دہشتگرد کہا جانے لگا

رواں برس کے آغازپرجب بھارت نے ویزا نہیں دیا تھا تو سوشل میڈیا پر کچھ لوگوں نے دہشتگرد کہنا شروع کردیا تھا، بولر۔فوٹو : فائل

---

انگلینڈ کے فاسٹ بولر ثاقب محمود کو سوشل میڈیا پر دہشتگرد کہا جانے لگا۔

ثاقب محمود کو دورہ نیوزی لینڈ کیلیے ٹیسٹ اور ٹوئنٹی 20 اسکواڈ کا حصہ بنایا گیا ہے، 22 سالہ ثاقب نے کہاکہ رواں برس کے آغاز پر جب بھارت نے ویزا نہیں دیا تھا تو سوشل میڈیا پر کچھ لوگوں نے انھیں دہشتگرد کہنا شروع کردیا تھا۔ جنوری میں دورہ بھارت کیلیے انگلینڈ لائنز کا حصہ بنایا گیا تاہم ویزا نہ ملنے کی وجہ سے ٹام بیلی کو ٹیم میں شامل کرلیا گیا تھا۔

ثاقب نے کہاکہ اچانک مجھے دہشتگرد کہا جانے لگا جبکہ میں نے کچھ بھی غلط نہیں کیا تھا، لوگ سمجھتے تھے کہ شاید مجھے ٹور پر جاکر کچھ کرنا تھا، میں ان باتوں کو بھلا نہیں سکا ہوں۔