مقبوضہ کشمیر میں بھارتی فوج کی دہشت گردی 7 افراد شہید

چھ شہری سرچ آپریشن ایک شہری دوران حراست شہید ( فوٹو : فائل)

---

SRINAGAR: قابض بھارتی فوج نے نام نہاد سرچ آپریشن کے دوران فائرنگ کرکے مقبوضہ کشمیر کے دو مختلف اضلاع میں 7 کشمیری نوجوانوں کو شہید کردیا۔

کشمیر میڈیا سروس کے مطابق جنت نظیر وادی پر پابندیوں اور جبر کے بادل گہرے ہوتے جا رہے ہیں، مودی سرکار کے ریاستی درندے نہتے کشمیریوں کو بھنبھوڑ رہے ہیں۔ آج ضلع گندربال اور ضلع رمبان مجموعی طور پر 6 کشمیری نوجوانوں کو شہید کردیا گیا۔

قابض بھارتی فوج نے مسافر بس کے اغوا کا ڈرامہ رچا کر ضلع گندربال میں داخلی و خارجی راستوں کو بند کرکے نام نہاد سرچ آپریشن کیا اور چادر و چار دیواری کے تقدس کو پامال کرتے ہوئے گھر گھر تلاشی کے دوران بنیادی انسانی حقوق کی سنگین کی پامالی کی اور 3 نوجوانوں کو شہید کردیا۔

یہ خبر پڑھیں: مسئلہ کشمیر کو اقوام متحدہ کی قراردادوں کے مطابق حل کیا جائے، چین

دوسری جانب ضلع رمبان میں بھی حکمراں جماعت بی جے پی کے مقامی رہنما کو اغوا کرکے یرغمال بنائے جانے کا بہانہ بناکر سرچ آپریشن کیا گیا جہاں 3 کشمیری نوجوانوں کو شہید کیا گیا، بھارتی فوج نے ساتواں شہری دوران حراست شہید کیا جب کہ سرچ آپریشن میں ایک بھارتی فوج کے اہلکار کی ہلاکت کی بھی اطلاع ہے۔

یہ خبر بھی پڑھیں: امریکا کا مقبوضہ کشمیرسے فوری کرفیواٹھانے کا مطالبہ

واضح رہے کہ مقبوضہ کشمیر میں 5 اگست کو خصوصی حیثیت کے خاتمے کے بعد سے تاحال کرفیو نافذ ہے، اشیائے خورد و نوش میں کمی اور جان بچانے والی ادویہ کا فقدان پیدا ہوگیا ہے، کاروباری سرگرمیاں ٹھپ ہیں، ذرائع آمدورفت معطل اور مواصلاتی نظام منقطع ہے۔

دریں اثنا عمران خان کے اقوام متحدہ کی جنرل اسمبلی میں خطاب کے دوران مسئلہ کشمیر کو انتہائی درست اور جرات مندانہ طریقے سے اجاگر کرنے پر کشمیری نوجوان جوش و جذبے سے سرشار ہوکر گھروں سے باہر نکل آئے اور ریلیاں نکالیں۔

کشمیری باشندوں نے دنیا کے سامنے مسئلہ کشمیر موثر انداز میں پیش کیے جانے پر جشن منایا اور بعض جگہ بھارت کی بدنامی اور کشمیر کو اجاگر کیے جانے پر رقص بھی کیا گیا۔ مظاہرین نے پاکستان اور کشمیر کے حق میں جب کہ بھارت مردہ باد کے نعرے لگائے۔