گھوٹکیپیپلز پارٹی کے کارکنوں کامہربرادران کی شمولیت پر احتجاج

سیکڑوں کارکنوں کا سرکٹ ہائوس سے پریس کلب تک جلوس،نعرے ،خودکشی کا انتباہ فوٹو: فائل

---

KARACHI: پیپلزپارٹی میں مہر برادران کی ممکنہ شمولیت کیخلاف سیکڑوں پی پی کارکنوں نے احتجاجی جلوس نکال کر نعرے لگائے، کارکنوں نے مہربرادران کو پارٹی میں شامل کرنے پر انتخابات میں ان کیخلاف امیدوار کھڑے کرکے خودکشی کی دھمکی دیدی۔تفصیلات کے مطابق پیپلز پارٹی میں مہر برادران کی ممکنہ شمولیت کیخلاف سیکڑوں پی پی کارکنوں نے سرکٹ ہائوس سے پریس کلب تک جلوس نکال کر نعرے لگائے ۔

اس موقع پر تحصیل صدر سکندر لاکھو، سید نادر شاہ، امتیاز علی شاہ، مولوی پہلوان سنگھڑ و دیگر نے کہا کہ مہروں کی پی پی میں شمولیت سے ضلع بھر سے پی پی کا نام و نشان مٹ جائیگا جوکہ ہم کبھی نہیں ہونے دینگے، انھوں نے مزید کہا کہ مہر برادران جاگیردارانہ ذہنیت رکھتے ہیں جن سے اچھائی کی کوئی امید نہیں رکھی جاسکتی، انھوں نے ہمیشہ پی پی سے بے وفائی کی ہے،

پارٹی قیادت سے اپیل کرتے ہیں کہ لٹیروں کو پی پی میں شامل نہ کیا جائے بصورت دیگر آئندہ انتخابات میں مہر برادران کیخلاف امیدوار کھڑے کرنے کے علاوہ سیکڑوں کارکن خودکشی پر مجبور ہوجائینگے۔ واضح رہے کہ پیپلزپارٹی کی قیادت کی جانب سے مہر برادران کو پارٹی میں شامل کرنے کے حوالے سے جام سیف اللہ دھاریجو کو تحفظات ہیں۔ ذرائع کا کہنا ہے کہ مہر برادران کیخلاف نکالی جانے والی ریلی کو بھی جام سیف اللہ دھاریجو نے منظم کیا تھا۔