حکومت کا نیکٹا کو وزارت داخلہ کے ماتحت کرنے کا فیصلہ

کابینہ نے سعودی پاک انڈسٹریل اینڈ ایگریکلچرل کمپنی کی مدت میں توسیع کی بھی منظوری دی (فوٹو: فائل)

---

وفاقی کابینہ نے نیشنل کاؤنٹر ٹیررازم اتھارٹی (نیکٹا) کو وزارت داخلہ کے ماتحت کرنے کے لیے رولز آف بزنس میں ترمیم کی منظوری دے دی۔

ایکسپریس نیوز کے مطابق وزیراعظم عمران خان کی زیر صدارت وفاقی کابینہ کا اجلاس منعقد ہوا، وزیراعظم نے کابینہ کو اپنے دورہ امریکا سے متعلق آگاہ کیا جب کہ کابینہ نے وزیراعظم کے جنرل اسمبلی میں خطاب کو تاریخی قرار دیتے ہوئے کامیاب دورہ امریکا پر مبارک باد پیش کی۔

ذرائع کے مطابق وفاقی کابینہ نے نیکٹا کو وزارت داخلہ کے ماتحت کرنے کی تجویز کی اصولی منظوری دی، اور کابینہ نے کابینہ کمیٹی نجکاری کے فیصلوں اور ای سی سی کے فیصلوں کی بھی توثیق کردی جب کہ سعودی پاک انڈسٹریل اینڈ ایگریکلچرل کمپنی کی مدت میں توسیع کی بھی منظوری دی گئی۔

اجلاس میں حلال اتھارٹی سے متعلق ای سی سی کے فیصلوں پر عمل درآمد کا جائزہ لیا گیا، جب کہ کے پی ٹی کی کثیرالمنزلہ عمارتوں کی تعمیر سے متعلق منصوبے پر بھی غور کیا گیا۔