ریلوے کی نجکاری ہوئی تواستعفیٰ دیدوں گا سعد رفیق

وفاقی وزیر ریلوے خواجہ سعد رفیق نے کہا ہے کہ اگر ریلوے کی نجکاری کرنا ہے تو ماننا پڑے گا کہ ہم ناکام ہو گئے۔

نجکاری کی گئی تو استعفیٰ دے دوں گا۔ پیر کوایک انٹر ویو میں خواجہ سعد رفیق نے کہا کہ ریلوے کا خسارہ کم کریں گے، خسارہ کم ہو گیا تو نجکاری کی ضرورت نہیں ہو گی، ریلوے کی نجکاری کی گئی تو وہ استعفیٰ دے دیں گے اور کوئی دوسری وزارت نہیں لیں گے۔




ایک سوال پر انھوں نے کہا کراچی سرکلر ریلوے کا منصوبہ آئندہ برس شروع کر دیا جائے گا، لاہور میٹرو ٹرین کا منصوبہ بھی مکمل کیا جائے گا، اس منصوبے میں کالا شاہ کاکو سے قصور تک ریلوے ٹریک بچھایا جائے گا۔ خواجہ سعد رفیق نے بتایا کہ اب کوئی کالی، پیلی یا نیلی ٹرین نہیں ہو گی۔ صرف قائد اعظم کا منظور شدہ رنگ استعمال کیا جائے گا۔ خواجہ سعد رفیق نے کہا کہ چین سے11 ارب روپے کے انجنوں کی خریداری کا منصوبہ منسوخ کیا، سودے میں ناکارہ انجن شامل تھے، ماضی میں بھی ایسے انجنوں کا استعمال کیا گیا۔