کراچی میں رینجرز و پولیس کا ٹارگٹڈ آپریشن جاری مزید 237 افراد گرفتار

گرفتار شدگان میں ٹارگٹ کلرز، بھتہ خور اور دیگر جرائم میں ملوث عناصر شامل، تعلق سیاسی جماعتوں اور کالعدم تنظیموں سے ہے

Staff Reporter October 09, 2013

سائوتھ زون پولیس نے28جرائم پیشہ عناصر کو گرفتار کر کے ان کے قبضے سے 4پستول، 14رائونڈ 4موبائل فون اور منشیات آمد کر لی۔ فوٹو: فائل

شہر میں پولیس اور رینجرز نے منگل کو بھی ٹارگٹڈ آپریشن اورچھاپہ مار کارروائیوں کے دوران ٹارگٹ کلرز ، بھتہ خوروں اور دیگر جرائم میں ملوث237 ملزمان کوگرفتار کر کے اسلحہ اور دیگر سامان برآمد کرلیا۔

پولیس اور رینجرز کی جانب سے شہر کے مختلف علاقوں میں ٹارگٹڈ آپریشن اور چھاپہ مار کارروائیاں کی گئیں۔ پریڈی پولیس نے سادہ اور معصوم شہریوں کو ملازمت دلوانے کا جھانسا دے کر لاکھوں روپے کی رقم لوٹ کر فرار ہونے والے ملزم کو اس کے ساتھی سمیت گرفتار کر لیا۔ ایس پی صدر سید سلمان حسین نے پریڈی تھانے میں پریس کانفرنس کرتے ہوئے بتایا کہ ملزم حاجی جاوید احمد ولد غلام حسین اور اس کے ساتھی وسیم کوپاسپورٹ آفس کے قریب سے گرفتار کر کے ان کے قبضے سے مختلف سر کاری محکموں کے جعلی لیٹر پیڈ ، مہریں ، ملازمتوں کے تقرر نامے اور دیگر سامان برآمد کر لیا گیا۔ گرفتار ملزم خودکو اے جی پی آر اوردیگر سر کاریمحکموں کا ملازم بتا کرشہریوں کو ملازمت کا جھانسا دے کر ان سے لاکھوں روپے لوٹتا تھا، سہراب گوٹھ پولیس نے خفیہ اطلاع پرکے ڈی اے روڈ نیو سبزی منڈی کے قریب کارروائی کرتے ہوئے2 ملزمان عبدالرحمٰن اور محمد رفیق کو گرفتار کر لیا، انکے قبضے سے 2 ٹی ٹی پستول، 5 رائونڈ اور کورے کار رجسٹریشن نمبر AWW-603 برآمد کر کے مقدمہ درج کر لیا گیا۔

سرجانی ٹائون پولیس نے کنیز فاطمہ فلیٹس کے قریب مقابلے کے بعد3 ملزمان محمد اسلم ولد حاجی نصر اﷲ، نظام الدینولد منیر محمد، ریحان ولد عبدالرحمن کو گرفتار کر لیا ، ملزمان کے قبضے سے2 ٹی ٹی پستول اور ایک ڈبل بیرل رائفل برآمد کر لی گئی۔ بلوچ کالونی پولیس نیاسٹریٹ کرائم میں ملوث ایک ملزم کو گرفتار کر کے چھینے ہوئے5 موبائل فون اور اسلحہ برآمد کر لیا۔ اورنگی ٹائون پولیس نے محمد سلیم ولد حشمت اور عباس علی ولد عبدالرحمن کو گرفتار کر کے اسلحہ اور خنجر برآمد کر لیا۔ ایسٹ زون پولیس نے چھاپہ مار کارروائیوں میں 69 ملزمان کو گرفتار کر کے ان کے قبضے سے ایک ہینڈ گرینیڈ ، 20پستول ، 56 راؤنڈ، موبائل فونز، نقد رقم اور منشیات برآمد کی۔ ڈی آئی جی ایسٹ منیر احمد شیخ کے مطابق گرفتار ملزمان میں39 مفرور و اشتہاری اور 2مشتبہ ملزمان بھی شامل ہیں جن کے خلاف مقدمات درج کیے گیے ہیں۔

ویسٹ زون پولیس نے چھاپہ مار کارروائیوں میں83ملزمان کو گرفتار کر کے ایک ہینڈ گرینیڈ ، 2کلاکوف ،ایکرپیٹر،ایکریوالور، چھینے ہوئے ایک لاکھ 70 ہزار نقد،2 مسروقہ موٹر سائیکلیں ، شراب کی بوتلیں اور منشیات برآمد کر لی۔ ڈی آئی جی ویسٹ جاوید عالم اوڈھو کے مطابق گرفتار ملزمان میں سپر مارکیٹ تھانے کی حدود سے گرفتار3 بھتہ خور، سائٹ تھانے کی حدود سے گرفتار 2 ٹارگٹ کلرزشامل ہیں۔ملزمان کے خلاف مختلف نوعیت کے مقدمات درج کر کے تفتیش شروع کردی گئی ہے۔ سائوتھ زون پولیس نے28جرائم پیشہ عناصر کو گرفتار کر کے ان کے قبضے سے 4پستول، 14رائونڈ 4موبائل فون اور منشیات آمد کر لی۔ ایس ایس پی سائوتھ منیر احمد شیخ کے مطابق گرفتار ملزمان میں3 اشتہاری اور16مفرور ملزمان شامل ہیں۔

رینجرز نے کلاکوٹ ، بغدادی ، چاکیواڑہ، اولڈ حاجی کیمپ، عثمان آباد، بہار کالونی، یاد گار فش جمشید روڈ ، لیاقت آباد ، پاک کالونی ، گلشن غازی شاہ لطیف ٹائون ،منگھوپیر ، جیکب لائن ، شاہ فیصلکالونی ،ماڈل کالونی ، گلشن اقبال ، نارتھ ناظم آباد، رضویہ ہما ہائٹس ،کالی پہاڑی کے علاقوں میں اسنیپ چیکنگ اورٹارگٹڈ آپریشن کے دوران 23افراد کو حراست میں لے لیا ۔ترجمان سندھ رینجرز کے مطابق حراست میں لیے جانے والے ملزمان کا تعلق سیاسی جماعتوں اور کالعدم تنظیموں سے ہے اور حراست میں لیے جانے والے سنگین جرائم میں ملوث ہیں۔حراست میں لیے جانے والے ملزمان کے قبضے سے ملنے والے اسلحے میں ایس ایم جیزاوررائفل بھی شامل ہیں۔ رینجرز ذرائع کے مطابق رینجرز نے جمشید روڈ کے قریب سو کوار ٹرزسے5 ، کورنگی سے3 اور گلبہارپیتل گلی سے 5 افراد کو حراست میں لے کر اسلحہ برآمد کیا ،حراست میں لیے جانے والے سیاسی جماعت کے کارکن بتائے جاتے ہیں جنھیں نامعلوم مقام پر منتقل کرکے تفتیش شروع کردی گئی۔ رینجرز نے لیاری بکرا پیڑی کے قریب ٹارگٹ آپریشن کرتے ہوئے لیاری گینگ وار کے ملزمان سمیت 6 افراد جبکہ لائنز ایریا میں چھاپہ مار کارروائی میں5 افراد کو پکڑا۔